پاکستان دے ہر حلقے وچ امیدوار کھڑے کراں گے،تحریک انصاف

اسلام آباد(پنجابی میڈیا گروپ) پاکستان تحریک انصاف نے دعو ی کیتا اے کہ 8فروری 2024 نوں ہون والے الیکشن وچ پارٹی دے اونہاں امیدواراں نوں الیکشن توں دور رکھن دا فیصلہ کیتا گیا اے جیہڑا جماعت دے ٹکٹ لئی موزوں ہو سکدے نیں۔ پاکستان تحریک انصاف دے ترجمان شعیب شاہین ایڈووکیٹ نے آکھیا کہ الیکشن شیڈول توں پہلاں متوقع امیدواراں دیاں گرفتاریاں تے مقدمیاں دا اک نوا سلسلہ شروع کر دتا گیا اے جس دا مقصد پارٹی دے موزوں ترین امیدواراں نوں الیکشن توں دور رکھنا اے۔شعیب شاہین نے اپنی گل جاری رکھدیاں ہویاں آکھیا لیکن اسیں وی اپنا ہوم ورک مکمل کرچکے ہاں تے پاکستان دے ہر حلقے وچ امیدوار کھڑے کراں گے۔اونہاں نے آکھیا کہ تُسی ویکھنا کہ جیہڑا پارٹی رہنما وی سر چُکدا اے تے سامنے آن دی کوشش کردا اے اوس نوں گرفتار کر لیا جاندا اے۔ بعض صورتاں وچ تے لاپتہ کردتا جاندا اے۔ علی اعوان دی مثال تہاڈے سامنے اے۔9 مئی بعد پاکستان تحریک انصاف دے درجناں رہنماواں نوں گرفتار کیتا گیا جنہاں وچوں اکثریت پارٹی چھڈن دا اعلان کر چکی اے جدکہ کئی اہم رہنما روپوش نیں۔