جیل وچ رہ کے وی الیکشن لڑاں گا، شیخ رشید دا وڈھا اعلان

راولپنڈی( پنجابی میڈیا گروپ)سربراہ عوامی مسلم لیگ تے سابق وفاقی وزیر شیخ رشید احمد نے آکھیا اے کہ جیل وچ رہ کے وی الیکشن لڑاں گا۔لہور ہائیکورٹ راولپنڈی بنچ دے باہر میڈیا نال گل بات کردیاں ہویاں شیخ رشید دا کہنا سی کہ نوازشریف نے بولنا شروع کر دتا اے، ہُن میں وی بولاں گا، یکم جنوری بعد پریس کلباںدا دورہ کراں گا۔اونہاں نے آکھیا کہ چلے توں پہلاں ہائیکورٹ وچ پلس نے بیان دتا اونہاں اُتے کوئی مقدمہ نہیں اے جنہے مقدمیاں وچ نام اے عدالت نے اوس دی تفصیل منگی اے، کل اے ٹی سی وچ میری ضمانت اُتے فیصلہ اے۔سابق وفاقی وزیردا کہنا سی کہ جیل وچ رہ کے وی الیکشن لڑاں گا، لطیف کھوسہ، اعتزاز، سلمان اکرم، سردار عبدالرازق، سردار شہباز نوں وکالت نامے دے دتے نیں اگر جیل وچ وی گیا تے اوہ میرے اٹارنی ہون گے۔شیخ رشید احمد نے ہور آکھیا کہ اوہ جیہڑے کہندے سن کہ ووٹ نوں عزت دیو،اوہ وی بلاول نے کل انوکھا لاڈلے توں کھولیا اے۔ایس توں پہلاں لہور ہائیکورٹ راولپنڈی بنچ نے شیخ رشید دی پنجاب وچ درج مقدمیاں دی تفصیلات فراہم کرن بارے دائر درخواست اُتے سماعت کیتی۔شیخ رشید اپنے وکیل سردار عبدالرازق تے سردار شہباز دے ہمراہ لہور ہائیکورٹ راولپنڈی بنچ دے جسٹس چودھری عبدالعزیزدی عدالت وچ پیش ہوئے۔عدالت نے فریقیاں نوں نوٹس جاری کردیاں ہویاں اک ہفتے وچ جواب منگ لیا تے کیس دی سماعت آئندہ ہفتے تک ملتوی کردتی۔