ملک وچ معاشی تباہی کرن والیاں نوں بے نقاب ہونا چاہیدا اے،مولانا فضل الرحمان

پشور( پنجابی میڈیاگروپ)سربراہ جمعیت علما اسلام مولانا فضل الرحمان نے آکھیا اے کہ معاشی تباہی حادثے تحت نہیں باقاعدہ منصوبہ بندی نال ہوئی اے، ملک وچ معاشی تباہی کرن والیاں نوں بے نقاب ہونا چاہیدا۔پشور وچ جلسہ عام نال خطاب وچ سربراہ جمعیت علما اسلام مولانا فضل الرحمان نے آکھیا کہ ہُن ساہنوں پرانیاں لکیراں مٹا کے نویں مستقبل نوں تراشنا ہوئے گا، پاکستان دی دنیا وچ اسلامی شناخت ہونی چاہیدی سی۔اونہاں نے آکھیا کہ پاکستان نوں معاشی دبا دا شکار بنایا جا رہیا اے ، ساڈھی فوج، بیوروکریسی نوں وی بلیک میل کیتا جا رہیا اے، پاکستان اُتے عالمی دبا ودھ رہیا اے، بھارت، ایران، افغانستان اُتے تے کوئی دبا نہیں، اوہ ساڈھے توں اگے جا رہے نیں۔مولانا فضل الرحمان نے آکھیا کہ پاکستان نوں معاشی بحران دا شکار بنانا کوئی حادثے دے طور اُتے نہیں اے،پچھلے 4توں5ورھیاں وچ ایسے لوکاں نوں لیائیا گیا، جنہاں جرنیلاں نے چیئرمین پی ٹی آئی نوں مسلط کیتا اوہ جرنیل وی مجرم نیں، اینہی معاشی تباہی حادثے تحت نہیں، باقاعدہ منصوبہ بندی تحت ہوئی، قوم سامنے اونہاں لوکاں نوں بے نقاب ہونا چاہیدا اے۔