سمارٹ لاک ڈان نافذ:لہورسنے پنجاب دے10ضلعیاں وچ تعلیمی ادارے بند

لہور( پنجابی میڈیا گروپ)لہورسنے پنجاب سے10ضلعیاں وچ سموگ دی وِگڑدی صورتحال توں سامنے رکھ دیاں ہویاں سمارٹ لاک ڈان نافذ کردتا گیا۔سمارٹ لاک ڈان دے تناظر وچ لہورسنے پنجاب سے10ضلعیاں وچ جمعہ،ہفتہ،تعلیمی ادارے بندرہن گے، اونہاں ضلعیاں وچ لہور، ننکانہ صاحب، شیخوپورہ، قصور، گوجرانوالہ، گجرات، سیالکوٹ، نارووال، حافظ آباد تے منڈی بہائوالدین شامل نیں، محکمہ سکول و ہائرایجوکیشن نے چھٹیاں دا نوٹیفکیشن جاری کردتا اے۔جمعہ،ہفتہ مارکیٹاں3 وجے کھلن گیاں جدکہ اتوار نوں کاروبار مکمل بند ہوئے گا، لہور وچ مال روڈ اُتے اتوار والے دن گڈیاں دا داخلہ بند ہوئے گا جدکہ صرف سائیکلنگ دی اجازت ہوگی۔دُوجے پاسے مارکیٹاں دی بندش بارے حکومتی فیصلے اُتے تحفظات دا اظہار کردیاں تاجراں نے آکھیا کہ حکومت مارکیٹاں دی بجائے سرکاری دفتراں، بینکاں نوں بند کروائے، مارکیٹاں3وجے کھولن نال تاجربرادری نوں وڈھا نقصان ہوئے گا۔تاجر برادری دا کہنا سی کہ حکومت جمعہ نوں مارکیٹاں3وجے کھولن دے فیصلے اُتے نظرثانی کرے۔