پٹرول 7روپے تک سستا ہونے داامکان

اسلام آباد(پنجابی میڈیا گروپ) یکم دسمبر توں پٹرول7روپے تک سستا ہون دا امکان اے۔اوگرا ولوں پٹرول دی قیمت وچ ردوبدل بارے ورکنگ شروع کر دتی گئی اے، عالمی منڈی وچ قیمت گھٹن دے نتیجے وچ اوگرا ولوں حکومت نوں گھلی جان والی سمری وچ پاکستان وچ وی پٹرول سستا ہون دا امکان اے، جس دے تحت پٹرول دی قیمت 7روپے فی لیٹر تے ڈیزل دی قیمت 6 روپے فی لیٹر گھٹن دی توقع اے، لیکن یکم دسمبربعد 15دناں لئی پٹرول دی قیمت دا حتمی اعلان نگران وزیر اعظم دی منظوری نال کیتا جائے گا۔رپورٹ مطابق عالمی مارکیٹ وچ خام تیل دی قیمت گھٹ ریکارڈ کیتی گئی اے جیتھے روسی تیل دی فی بیرل قیمت60 ڈالر توں وی تھلے آچکی اے، یورپی یونین ولوں روسی تیل دی60 ڈالر فی بیرل دی حد مقرر کیتی گئی اے مگر مارکیٹ وچ روسی تیل دی قیمت مقررہ حد توں وی تھلے چلی گئی اے۔