سائفر کیس:چیئرمین پی ٹی آئی داٹرائل اڈیالہ جیل وچ ہوئے گا،عدالت دا فیصلہ

راولپنڈی( پنجابی میڈیا گروپ)آفیشل سیکرٹ ایکٹ دی خصوصی عدالت نے سائفر کیس وچ فیصلہ سناندیاں آکھیا اے کہ سپرنٹنڈنٹ اڈیالہ جیل دی سکیورٹی رپورٹ دی روشنی وچ چیئرمین پی ٹی آئی دا ٹرائل جیل وچ ہوئے گا۔سائفر کیس وچ چیئرمین تحریک انصاف تے شاہ محمود قریشی نوں عدالت وچ پیش کرن یا نہ کرن بارے آفیشل سیکرٹ ایکٹ دی عدالت نے محفوظ فیصلہ سنا دتا۔اسلام آباد دے جوڈیشل کمپلیکس وچ آفیشل سیکرٹ ایکٹ دی خصوصی عدالت دے جج ابوالحسنات محمد ذوالقرنین نے سائفر کیس دی سماعت کیتی۔ایس موقع اُتے چیئرمین پی ٹی آئی دے وکیل سلمان صفدر، ایف آئی اے پراسیکیوٹر شاہ خاور تے ذوالفقار عباس عدالت وچ پیش ہوئے، چیئرمین پی ٹی آئی دیاں بہناں تے شاہ محمود قریشی دی بیٹی وی عدالت پہنچیاں۔وکیل سلمان صفدر نے آکھیا کہ اج 2مختلف معاملے عدالت وچ ہین، امید سی کہ چیئرمین پی ٹی آئی نوں پیش کرن گے لیکن نہیں کیتا گیا، ایہ ریکارڈ کیس اے ایہنی رفتار نال کَدی کیس نہیں چلیا ۔ایس دوران جج ابوالحسنات نے عدالتی عملے نوںکیس دا ریکارڈ پیش کرن دی ہدایت کیتی۔دوران سماعت جیل حکام نے چیئرمین پی ٹی آئی دی عدالت وچ پیشی بارے رپورٹ پیش کیتی جس دا جج نے جائزہ لئیا تے آکھیا کہ جیل حکام دا کہنا اے کہ چیئرمین پی ٹی آئی نوں پیش نہیں کر سکدے، اسلام آباد پلس نوںوَدھ سکیورٹی لئی خط لکھیا تے دسیا گیا چیئرمین پی ٹی آئی نوں سکیورٹی خدشات نیں۔بعد وچ عدالت نے محفوظ فیصلہ سناندیاں ہویاں آکھیاکہ سپرنٹنڈنٹ اڈیالہ جیل دی سکیورٹی رپورٹ دی روشنی وچ جیل اندر ٹرائل ہوئے گا جیہڑا اوپن ہوئے گا، میڈیا تے پبلک نوں وی رَلت دی اجازت ہوئے گی، پہلاں ونگوں 5،5 فیملی ممبراں نوں وی اجازت ہوئے گی، سائفر کیس دی آئندہ سماعت جمعہ نوں اڈیالہ جیل وچ ہوئے گی۔واضح رہے کہ عدالت نے چیئرمین پی ٹی آئی تے شاہ محمود قریشی نوں پیش کرن دا حکم دے رکھیا اے۔