الیکشن ویلے اُتے ہی ہون گے، بلاول بھٹو

لہور(پنجابی میڈیاگروپ)پاکستان پیپلز پارٹی دے چیئرمین بلاول بھٹو زرداری نے آکھیا اے کہ پاکستان وچ کوئی وی تنخواہ وچ گزارہ نہیں کر سکدا، اقتدار وچ آ کے تنخواہواں ڈبل کر دیاں گے، الیکشن ویلے اُتے ہون گے۔لہور دے حلقہ این اے 127 وچ خطاب کردیاں ہویاں چیئرمین پیپلز پارٹی نے آکھیا کہ اج مینوں بوہت خوشی ہو رہی اے کہ شہید ذوالفقار علی بھٹو دا جنم دیہاڑ لہوروچ منایا گیا۔بلاول بھٹو دا کہنا سی کہ شہید بینظیر بھٹو نے تہاڈی نمائندگی کیتی، اک ہی سیاسی جماعت اے جیہڑی عوام دی نمائندگی کررہی اے، میرے سفیربن کے گھر گھر پہنچن تے میرے 10 وعدیاںبارے دسن، اسیں عوام نوں 300 یونٹ تک مفت یونٹ بجلی فراہم کراں گے۔اونہاں نے آکھیا کہ بینظیر انکم سپورٹ پروگرام پاروں عوام نوں مالی مدد فراہم کیتی جا رہی اے، پیپلز پارٹی واحد جماعت اے جیہڑی بینظیر انکم سپورٹ پروگرام لے کے آئی،اسیں مزدوراںنوں وی بینظیر کارڈ فراہم کراں گے، اسیں کساناں نوں کسان کارڈ تے نوجواناں نوں وی نوجوان کارڈ دلاواں گے، ایس ویلے غربت، مہنگائی بیروزگاری عروج اُتے اے۔چیئرمین پپیلز پارٹی نے آکھیا کہ میں نفرت دی سیاست اُتے یقین نہیں رکھدا، میں گالم گلوچ دی سیاست اُتے یقین نہیں رکھدا، میں ایس پرانی، تقسیم، نفرت دی سیاست نوں دفن کرنا چاہندا ہاں، میں تہاڈی بھرپور مدد کرنا چاہندا ہاں۔