8 فروری دے الیکشن پاکستان دی ترقی دا آغاز ثابت ہون گے،شہبازشریف

لہور(پنجابی میڈیاگروپ)پاکستان مسلم ن دے صدروسابق وزیراعظم شہبازشریف نے آکھیا اے کہ8فروری دے الیکشن پاکستان دی ترقی دا نکتہ آغاز ثابت ہون گے۔صدر پاکستان مسلم لیگ ن شہباز شریف نال پارٹی رہنماواں نے ملاقات کیتی اے، ملاقات وچ پارٹی امور تے الیکشن دیاں تیاریاں دے حوالے نال تبادلہ خیال کیتا گیا، شہباز شریف نے عام الیکشن دیاں تیاریاں بارے پارٹی کارکناں تے رہنماواں دے جذبے دی تعریف کیتی۔ملاقات وچ سابق وزیر خواجہ سعد رفیق، خواجہ سلمان رفیق، میاں جاوید لطیف، میاں عطا مانیکا، ملک افضل کھوکھر، محسن شاہنواز رانجھا، ڈاکٹر ذوالفقار بھٹی، سردار عرفان ڈوگر شامل سن۔ملک سیف الملوک کھوکھر، چودھری محمد طفیل جٹ تے محمد اشرف جٹ نے وی پارٹی صدر نال وَِکھ وَکھ ملاقات کیتی۔ایس موقع اُتے گل بات کردیاں ہویاں شہباز شریف دا کہنا سی کہ عوام نوں مہنگائی توں نجات دلان لئی انقلابی اقدام کراں گے،عوام ویکھ چکی اے مسلم لیگ(ن) دے سوا باقی سب نے دھوکہ دتا، عوام نال وعدے صرف نواز شریف نے پورے کیتے۔سابق وزیراعظم نے آکھیا کہ مالیاتی اداریاں، سرمایہ کاراں دے نال عوام دے اعتماد نوں بحال کراں گے، اقتصادی پالیسی میں توازن لیاواں گے، عوام تے مالیاتی اداریاں دوناں نوں نال لے کے چلاں گے۔