طاقتور نوں قنون دے تابع کرن دی کوشش اُتے مینوں سزادتی جارہی اے،عمران خان

راولپنڈی(پنجابی میڈیاگروپ)پاکستان تحریک انصاف(پی ٹی آئی) دے بانی عمران خان نے آکھیا اے کہ توشہ خانہ کیس وچ چپڑاسی سنے 2 بندیاں نوں میرے خلاف وعدہ معاف گواہ بنایا گیا اے۔توشہ خانہ کیس دی اڈیالہ جیل وچ سماعت اُتے صحافیاں نال غیر رسمی گل بات وچ عمران خان نے آکھیا کہ توشہ خانہ وچ آکھیا گیا اے کہ میں نے اپنے آفس بوائے ذریعے ارباں روپے دی کرپشن کیتی تے ارباں دا فائدہ چُکیا،بطور وزیراعظم میں کسی ہوردا نہیں بلکہ اپنے آفس بوائے دا استعمال کراں، کیا اینج ممکن اے؟اونہاں نے آکھیا کہ میرے خلاف چپڑاسی سنے 2بندیاںنوں وعدہ معاف گواہ بنایا گیا اے، کیا ایہ معاشرہ امر باالمعروف اُتے چل رہیا اے؟جدکہ ایہ اک اسلامی معاشرہ اے۔ عمران خان دا کہنا سی کہ معاشرہ اچھائی، برائی اُتے ہُندا اے، اچھائی ختم تے معاشرہ ختم ہوجاندااے۔بانی پی ٹی آئی دا کہنا سی کہ میں طاقتور نوں قنون دے تابع کرن دی کوشش کیتی جس دی مینوں سزادتی جارہی اے۔سپریم کورٹ دے پچھلے دناں نااہلی دی مدت بارے فیصلے اُتے عمران خان نے آکھیا کہ ایہ عدالتی فیصلہ اے جس اُتے کوئی تبصرہ نہیں کرسکدا۔ ایسی طرح اک صحافی دے شیخ رشید نال اتحاد بارے سوال اُتے بانی پی ٹی آئی نے آکھیاکہ سیاسی سیٹ اپ فیصلہ کرے گا۔عمران خان نے صحافیاں نال غیر رسمی گل بات وچ ایہ وی دسیا کہ5مہینیاں وچ صرف 2وار پُتراں نال گل کرائی گی۔