پی ٹی آئی دی فتح:الیکشن کمیشن دا فیصلہ کالعدم’’بلے‘‘داانتخابی نشان بحال

پشور(پنجابی میڈیاگروپ)پشور ہائیکورٹ نے پی ٹی آئی انٹرا پارٹی الیکشن تے انتخابی نشان بارے کیس دا فیصلہ سناندیاں ہویاں تحریک انصاف داانتخابی نشان’’بل‘‘بحال کردتا۔پشور ہائی کورٹ وچ پی ٹی آئی انٹرا پارٹی الیکشن تے بلے دے انتخابی نشان بارے کیس دی سماعت ہوئی، عدالت عالیہ دے جج جسٹس اعجاز انور تے جسٹس سید ارشد علی نے پی ٹی آئی دی درخواست اُتے سماعت کیتی۔دوران سماعت قاضی جواد ایڈووکیٹ نے دلائل دیندیاں ہویاں آکھیا کہ میرے موکل نے پی ٹی آئی دے مرکزی دفتر توں معلومات لینا چاہیاں جیہڑیاں اونہاں نوں نہیں ملیاں، میڈیا توں پتہ چلیا کہ پی ٹی آئی انٹرا پارٹی الیکشن ہوئے، اسیں درخواست کیتی کہ الیکشن کالعدم قرار دتے جان، میرے موکل الیکشن وچ حصہ لینا چا ہندے سن مگر اونہاں نوں موقع نہیں دتا گیا۔جسٹس اعجاز انور نے سوال کیتا کہ تُسی ایہ نہیں آکھیا کہ انٹرا پارٹی الیکشن دوبارہ کرائے جان؟ الیکشن کمیشن نے انٹرا پارٹی الیکشن کالعدم قرار دتے تے تہانوں چاہیدا سی کہ دوبارہ الیکشن دا مطالبہ کر دے، تسی اگر پارٹی توں سو تے پارٹی نشان واپس لین اُتے تہانوں اعتراض کرنا چاہیدا سی تُسی نہیں کیتا۔وکیل قاضی جواد نے آکھیا کہ ساہنوں تے الیکشن وچ موقع نہیں دتا گیا ایس لئی اونہاں دے خلاف الیکشن کمیشن گئے۔پشور ہائیکورٹ دے2رکنی بنچ نے درخواست گزاراں، الیکشن کمیشن تے پی ٹی آئی وکیلاں دے دلائل سنن دے بعد محفوظ فیصلہ سناندیاں ہویاں تحریک انصاف دا انتخابی نشان’’بلا‘‘بحال کر دتا۔مختصر فیصلے وچ پشور ہائی کورٹ نے 3 اہم پوائنٹ سنائے، جنہاں وچوں عدالت نے قراردتا کہ الیکشن کمیشن دا22دسمبردا فیصلہ غیر آئینی اے، پی ٹی آئی انٹرا پارٹی الیکشن دا سرٹیفکیٹ ویب سائٹ اُتے جاری کیتا جائے تے پی ٹی آئی ’’بلے‘‘ دے انتخابی نشاندی حقدار اے، انتخابی نشان دتا جائے۔