نوجواناں نال مل کے ملک نوں ایشین ٹائیگر بناواں گے،نوازشریف

قصور(بیورورپورٹ)قائد مسلم لیگ ن میاں نوازشریف نے آکھیا کہ نوجوان ساڈھے نال نیں،ملک نوں ایشین ٹائیگر بناواں گے۔کھڈیاں خاص کرالیکشن مہم دے آخری دن جلسہ نال خطاب کردیاں ہویاں قائد مسلم لیگ ن میاں نوازشریف دا کہنا سی کہ ساڈھی حکومت نہ جاندی تے ایتھے موجود ہر شخص چنگی روٹی روزی کما رہیا ہُندا،موجودہ دور وچ ہر نوجوان نوں روزگار ملنا چا ہیدا اے۔اونہاں نے آکھیا کہ اسیں ایس دور توں باہر نکلنا اے،اسیںفیر ملک نوں ایشین ٹائیگر بنانا اے، شہبازشریف ایس جذے نوں پاکستان لئی استعمال کروایہ پاکستان دی تقدیر بدل کررکھ دیوے گا۔قائد ن لیگ دا کہنا سی کہ کھڈیاں دیاں سڑکاں نوں پیرس دیاں سڑکاں توں بہتر بناواں گے، ایتھے نوجواناں لئی یونیورسٹی ہونی چا ہیدی اے، اونہاں دے ہتھاں وچ لیپ ٹاپ تے کمپیوٹرہونے چا ہیدے نیں۔نوازشریف دا کہنا سی کہ کھڈیاں دے نوجواناں نوں ہنرسکھاواں گے تے باعزت نوکریاں وی دیاں گے،کھڈیاں وچ رہن والے نوجواناں لئی سٹیڈیم وی ہونا چاہیدا اے تاکہ اونہاں نوں صحت مند تفریحی دے موقع میسر آسکن ۔قائد ن لیگ دا کہنا سی کہ ایتھے جَِد سٹیڈیم بنے گا تے میں شہبازشریف نوں افتتاح لئی لے کے آواں گا ، میں ایتھے سٹیڈیم وچ اوپنگ میچ کھیڈاں گا۔اونہاں نے آکھیا کہ جیہڑے کہندے سن کہ نوجواناں نوں1کروڑ نوکریاں ملن گیاں لکھاں گھرملن گے، کیتھے گئیاں نوکریاں تے کیتھے گئے گھر؟نوازشریف دا کہنا سی کہ ساڈھا دورایسا سی کہ10روپے کلو سبزی ملدی سی، میرے دور وچ روٹی4روپے دی وی،20روپے وچ5 روٹیاں ملدیاں سن، ساڈھے دور وچ5لکھ روپے دیاں گڈیاں ملدیاں سن۔اونہاں نے ہور آکھیا کہ اسیں اج آخری جلسہ کھڈیاں وچ کررہے ہاں، امید اے ایتھے موجود نوجوان ساڈھے کندھے دے نال کندھا ملا کے پاکستان دی ترقی وچ ساڈھا ساتھ دین گے، نوجواناں داایہ جذبہ پاکستانی ترقی دی نوید سنا رہیا اے۔