ملک بھر وچ الیکشن 100فیصد شفاف ہوئے،چیف الیکشن کمشنر

اسلام آباد(پنجابی میڈیاگروپ)چیف الیکشن کمشنر سکندر سلطان راجہ نے آکھیا اے کہ ملک بھر وچ الیکشن 100فیصد صاف شفاف ہوئے نیں، پورے پاکستان وچ کسی ووٹر نوں نہیں روکیا گیا، یقین اے الیکشن دے نتجے نوں تسلیم کیتا جائے گا۔الیکشن کمیشن آفس وچ میڈیا نال گل بات کردیاں ہویاں اونہاں نے آکھیا کہ الیکشن 100فیصد شفاف تے پرامن ہوئے، پولنگ دا عمل بغیرکسی دے وقفے نال جاری رہیا کسی شہری نوں ووٹ کاسٹ کرن توں نہیں روکیا گیا۔اونہاں نے آکھیا کہ جیتھے کنیکٹویٹی دا مسئلہ ہوئے گا متعلقہ پریزائیڈنگ افسر خود متعلقہ ریٹرننگ افسر دے دفتر جا کے فارم45فراہم کرے گا، ای ایم ایس وچ فارم 45 اپ لوڈ کرن دے بعد جیتھے سروس بحال ہوئے گی فارم خود بخود آر او نوں موصول ہوجائے گا، قنون مطابق دن 2وجے تک اگر ویلاودھان داآکھیا جاندا اے تے ویلاودھایا جاسکدا اے گجرات دے 3 پولنگ اسٹیشناں وچ ویلاودھایا گیا کیونکہ متعلقہ آر اوز نے ویلا ودھان دی درخواست کیتی سی۔ایس توں پہلاں چیف الیکشن کمشنرسکندر سلطان راجا نے میڈیا نال گل بات کر دیاں آکھیاکہ آر او نے رات2وجے تک نتیجہ جاری کرنا اے لیکن نتائج 2 وجے توں پہلاں وی آ سکدے نیں۔چیف الیکشن کمشنر داہور کہنا سی کہ عوام نوں حتمی پولنگ اسکیم جاری ہُندیاں ہی اپنا ووٹ چیک کرلینا چا ہیدا سی ۔ سیکورٹی خدشے پاروں بند موبائل سروس بحال کرن دا حکم دینا ساڈھا مینڈیٹ نہیں۔ الیکشن کمیشن پہلاں ونگوں مضبوط اے۔