الیکشن کمیشن نے ملک بھر دے انتخابی حلقیاں دا نتیجہ جاری کردتا

اسلام آباد(بیورورپورٹ)الیکشن کمیشن نے ملک بھر دے852قومی وصوبائی اسمبلیاں دے حلقیاں دا غیر سرکاری نتیجہ جاری کردتا۔الیکشن کمیشن نے پورے ملک وچ3حلقیاں اُتے الیکشن ملتوی کیتے، 3حلقیاں دے نتیجے روکے۔الیکشن کمیشن ولوں قومی اسمبلی دیاں264جنرل نشستاں دے غیر حتمی نتیجے جاری کردتے گئے، قومی اسمبلی دے حلقہ این اے8 وچ امیدوار دے انتقال پاروں الیکشن ملتوی جدکہ این اے88 دے نتیجے نوں روک دتا گیا۔قومی اسمبلی دیاں264نشستاں وچوںآزاد امیدوار101 نشستاں لے کے سب توں اگے نیں، مسلم لیگ(ن)75 تے پیپلز پارٹی نے 54 نشستاں حاصل کیتیاں نیں، متحدہ قومی موومنٹ (ایم کیو ایم)پاکستان نے17نشستاں حاصل کیتیاں، جمعیت علمائے اسلام(پاکستان) نے4 جدکہ پاکستان مسلم لیگ نے 3 نشستاں اُتے کامیابی سمیٹی۔استحکام پاکستان پارٹی(آئی پی پی) تے بلوچستان نیشنل پارٹی(بی این پی)نے وی 2،2 نشستاں حاصل کیتیاں، مجلس وحدت المسلمین(ایم ڈبلیو ایم)پاکستان، پاکستان مسلم لیگ (ضیا)،پشتونخوا نیشنل عوامی پارٹی، بلوچستان عوامی پارٹی، نیشنل پارٹی تے پشتونخوا ملی عوامی پارٹی نے 1، 1 نشست حاصل کیتی۔الیکشن کمیشن نے پنجاب اسمبلی دی 297 نشستاں وچوں296 نشستاں دے غیرحتمی نتائج جاری کیتے نیں جدکہ رحیم یارخان دے حلقہ پی پی266اُتے الیکشن ملتوی کیتے گئے نیں۔پنجاب اسمبلی دی296نشستاں وچوں138نشستاں اُتے آزاد امیدواراں نے کامیابی حاصل کر لئی جدکہ مسلم لیگ (ن)صوبائی اسمبلی وچ اکثریتی جماعت بن گئی جس دے137امیدوار کامیاب ہوگئے۔غیرحتمی نتجے مطابق پیپلز پارٹی نے پنجاب اسمبلی دیاں 10، مسلم لیگ (ق)نے 8 جدکہ تحریک لبیک، مسلم لیگ (ضیا) تے استحکام پاکستان پارٹی(آئی پی پی) نے اک، اک نشست اُتے کامیابی حاصل کیتی۔الیکشن کمیشن نے سندھ اسمبلی دیاں 130 نشستاں وچوں 129 نشستاں دا غیرسرکاری نتجہ جاری کردتا جدکہ حلقہ پی ایس 18 گھوٹکی دا نتیجہ روک لیا گیا اے جس اُتے15 فروری نوں دوبارہ الیکشن ہون گے۔غیر سرکاری نتیجے مطابق سندھ اسمبلی وچ پیپلزپارٹی(پی پی پی) 84 نشستاں دے نال صوبے دی سب توں وڈھی جماعت بن کے سامنے آئی اے۔ایم کیو ایم پاکستان 28 نشستاں دے نال دُوجے نمبر اُتے اے، آزاد امیدواراں نے 13 نشستاں جِتیاں، گرینڈ ڈیموکریٹک الائنس (جی ڈی اے)تے جماعت اسلامی 2، 2 نشستاں اُتے کامیاب قرار پائیاں۔الیکشن کمیشن نے خیبرپختونخوا اسمبلی دیاں115 وچوں 112نشستاں دے غیرسرکاری نتیجے جاری کردتے نیں، پی ایس 22 تے پی ایس 91 اُتے الیکشن ملتوی کردتے گئے جدکہ پی ایس 90 دے نتیجے نوں روکیا گیا اے۔غیر حتمی نتیجے دے مطابق خیبرپختونخوا وچ آزاد امیدواراں نے90 نشستاں جت لیاں نیں، جمعیت علمائے اسلام (پاکستان) دے امیدوار 7 نشستاں دے نال دُوجے نمبر اُتے نیں۔مسلم لیگ (ن) 5 نشستاں دے نال تریجے نمبراُتے اے، پیپلزپارٹی 4 نشستاں اُتے کامیاب ہوئی،جماعت اسلامی 3، تحریک انصاف پارلیمنٹیرینز 2 تے عوامی نیشنل پارٹی (اے این پی)اک نشست اُتے کامیابی حاصل کرسکی۔الیکشن کمیشن نے بلوچستان اسمبلی دیاں ساریاں 51 نشستاں دا غیرسرکاری نتجہ جاری کردتا اے، بلوچستان اسمبلی وچ پیپلزپارٹی تے جمعیت علمائے اسلام (پاکستان) نے 11،11 جدکہ مسلم لیگ (ن)نے 10 نشستاں اُتے کامیابی حاصل کیتی۔آزاد امیدوار 6، بلوچستان عوامی پارٹی 4، نیشنل پارٹی 3 جدکہ عوامی نیشنل پارٹی 2 نشستاں اُتے کامیاب ہوئی اے، بلوچستان نیشنل پارٹی (مینگل)، بلوچستان نیشنل پارٹی(عوامی)، جماعت اسلامی تے حق دوتحریک دا اک اک امیدوار کامیاب ہویا۔