پاکستان نوں پیراں اُتے کھڑا کراں گے،مشکل ضرور اے پر ناممکن نہیں،نومنتخب وزیراعظم

اسلام آباد(بیورورپورٹ)نومنتخب وزیراعظم تے پاکستان مسلم لیگ ن دے صدرشہبازشریف نے آکھیا اے کہ پاکستان نوں پیراں اُتے کھڑا کراں گے،ایہ مشکل ضرور اے مگرناممکن نہیں۔قائد ایوان دی نشست سنبھالن دے بعد قومی اسمبلی وچ خطاب کردیاں ہویاں نومنتخب وزیراعظم شہبازشریف دا کہنا سی کہ قائدنوازشریف نے مینوں ایس منصب لئی نامزدکیتا اونہاں دا شکرگزارہاں، آصف زرداری، بلاول بھٹو تے خالد مقبول صدیقی دا وی شکریہ ادا کردا ہاں، شجاعت حسین ،سالک حسین، عبدالعلیم خان تے خالد مگسی دا وی مشکور ہاں۔”اپوزیشن نوں میثاق مفاہمت دی دعوت”اونہاں نے آکھیا کہ میں نے 2018میثاق معیشت دی گل کیتی سی، میں اج اونہاںنوں میثاق مفاہمت دی دعوت دینداہاں،آئو مل کے بیٹھیئے تے پاکستان دی قسمت سنوار یئے، پاکستان دی تقدیر بنان لئی سب نوں مل کے فیصلہ کرنااے ۔صدر مسلم لیگ ن نے آکھیا کہ میرے قائدنوازشریف 3واروزیراعظم پاکستان منتخب ہوئے، نوازشریف دی لیڈر شپ وچ ترقی وخوشحالی دے انقلاب آئے، نوازشریف معمار پاکستان نیں،20،20گھنٹے دی لوڈشیڈنگ نوازشریف دے دورحکومت وچ ختم ہوئی، پاکستان وچ ایٹمی قوت دی بنیادرکھی۔