76 ورھیاں توں سمگلنگ نے ملک نوں بے پناہ نقصان پہنچایا،وزیراعظم

اسلام آباد(بیورورپورٹ)وزیر اعظم میاں شہباز شریف نے آکھیا اے کہ76ورھیاں توں سمگلنگ نے ملک نوں بے پناہ نقصان پہنچایا۔وزیر اعظم میاں شہبازشریف نے اسلام آباد وچ انسداد سمگلنگ بارے اجلاس نال خطاب کر دیاں ہو یاں آکھیا کہ چاراں صوبیاں دے وزرااعلی،چیف سیکرٹریاں تے سول و فوجی افسراں نوںسلام پیش کردا ہاں، مشکورہاں کہ اج تُسی ویلا کَڈ کے ایتھے تشریف لیائے۔میاں شہباز شریف دا کہنا سی کہ ملک وچ نویاں منتخب حکومتاں الیکشن دے نتیجے وچ آچکیاں نیں، پاکستان وچ ساہنوںمختلف حوالیاں نال چیلنجاں دا سامنا اے، ملک وچ ایس ویلے سیاسی افراتفری ختم ہونا ضروری اے،ساریاں سیاسی جماعتاں نوں یکسوئی دے نال پاکستان نوں چیلنجاں توں کَڈنا اے۔وزیر اعظم نے آکھیا کہ ساڈھی مخلوط حکومت نے چینی ایکسپورٹ لئی ڈھائی لکھ ٹن دی اجازت دتی سی، چینی افغانستان سمگل ہوئی، جیہڑی چینی فروخت کرکے اسیں ڈالر کما سکدے ساں اوہ افغانستان سمگل ہوئی۔اونہاں داکہنا سی کہ ملک وچ سالانہ 400یا 500ارب روپے دی بجلی چوری ہُندی اے،نگران حکومت وچ توانائی دے شعبے وچ 58ارب روپے دی چوری ریکور ہوئی، نگران دور حکومت وچ سمگلنگ ختم کرن بارے ٹھوس اقدام کیتے گئے۔