حکومت مطیع اللہ جان دے کیس وچ کجھ نہیں کردی تے ایسا حکم دیاں گے جیہڑا پسند نہیں آئے گا،سپریم کورٹ

اسلام آباد(بیورورپورٹ) سپریم کورٹ دے چیف جسٹس قاضی فائز عیسیٰ نے وفاقی تحقیقاتی ادارے (ایف آئی اے) ولوںصحافیاں نوں نوٹس جاری کرن بارے کیس دی سماعت کر دیاں ہویاں ریمارکس دتے اگر حکومت مطیع اللہ جان دے کیس وچ کجھ نہیں کر دی تے ایسا حکم دیاں گے جیہڑا پسند نہیں آٰئے گا۔چیف جسٹس دی سربراہی وچ 3 رکنی بینچ نے کیس دی سماعت کیتی۔سماعت دے شروع اُتے پریس ایسوسی ایشن دے وکیل بیرسٹر صلاح الدین نے آکھیا کہ کیس وچ کجھ وی ارجنٹ نہیں اے، ایس اُتے چیف جسٹس نے دریافت کیتا کہ بیرسٹر حیدر وحید کیتھے نیں؟ وکیل نے دسیا کہ اوہ میڈیا ریگولیشن بارے اپنی درخواست واپس لینا چا ہندے نیں۔چیف جسٹس قاضی فائز عیسیٰ نے استفسار کیتا کہ مگر اوہ عدالتی کارروائی لئی نہیں آئے، کیا اونہاںدی پٹیشن آزادی اظہار نوں یقینی بناندی یا ہور روک دی؟اونہاںدے کیس وچ درخواست گزار کون سن؟ 2022 توں ایہ درخواست کس بنیاد اُتے دائر سی؟ کیا اونہاں دامقصد پورا ہو گیا اے؟چیف جسٹس نے آکھیا کہ درخواست گزاراں وچ کوئی چکوال دا سی کوئی اسلام آباد دا، کیہڑا سانجھا مفاد سی جیہراینہاں درخواست گزاراں نوں نال لایا سی؟ میڈیا وچ وی بڑی منتخب رپورٹنگ ہُندی اے، ہُن ایہ رپورٹ نہیں ہوئے گا کہ ایہ6 درخواست گزار غائب ہو گئے، ایسے لئی اسیں آکھیا سی کہ اسیں اپنا یوٹیوب چینل چلاواں گے۔