ججاں دے خطاں دے معاملے اُتے سیاست نہیں ذمہ داری دا مظاہرہ کرنا چاہیدا اے،وزیراعظم

اسلام آباد(بیورورپورٹ)وزیراعظم شہبازشریف نے آکھیا اے کہ ججاں دے خطاں دے معاملے اُتے ساہنوں سیاست نہیں ذمہ داری دا مظاہرہ کرنا چاہیدااے۔اسلام آباد وچ وفاقی کابینہ دے اجلاس نال خطاب کر دیاں ہویاں وزیراعظم شہباز شریف نے آکھیا اے کہ ججاں نوں موصول ہون والے مشکوک خطاں دے معاملے اُتے اسیں تحقیق کراواں گے تاکہ دودھ دا دودھ پانی دا پانی ہوئے ۔اونہاں نے دسیا کہ6ہائی کورٹ دے ججاں دے معاملے اُتے سپریم کورٹ دے نال میٹنگ وچ کابینہ دی منظوری دے نال فیصلہ کیتا گیا کہ انکوائری کمیشن بنایا جائے تے سابق جسٹس (ر)تصدق جیلانی دے مشورے تے رضا مندی دے نال کمیشن نوں نوٹی فائی کیتا تے ٹی اوآرز نوں وی نوٹیفائی کیتا۔شہباز شریف نے آکھیا کہ بعد وچ تصدق جیلانی نے کمیشن دی سربراہی توں معذرت کر لئی تے سپریم کورٹ نے پرسوں ایس اُتے سو موٹو لے لیا تے اوس دی سماعت توں سب نوںآگاہ کیتا، ہُن سپریم کورٹ ایس معاملے نوں ویکھے گی ، اسیں اپنی ذمہ داری پوری کردتی سی تے فیر اوس وچ تبدیلی آئی اے وزیراعظم دااجلاس نال خطاب کر دیاں ہویاں کہنا سی کہ میں خود چینی سفیر دے نال داسو گیا تے اوتھے چینی ورکراں نال ملاقات کر کے اونہاں نوںتسلی دتی، وزارت خارجہ توں چینی وفد وی آیا سی جیہڑیاں میتیاں سن اونہاں نوں وی پہنچا دتا اے تے چینی ورکراں دی سکیورٹی نوں فول پروف بنان لئی تیزی نال کم کررہے ہاں۔