وزیراعظم شہبازشریف تے سعودی ولی عہد دی ملاقات دا سانجھااعلامیہ جاری

ریاض(بیورورپورٹ)سعودی ولی عہد شہزادہ محمد بن سلمان بن عبدالعزیز نال وزیراعظم شہبازشریف دی ملاقات دے بعددا سانجھااعلامیہ جاری کردتا گیا۔جاری کردہ اعلامیہ وچ آکھیا گیا شہزادہ محمد بن سلمان نال شہبازشریف نے الصفا پیلس مکہ المکرمہ وچ باضابطہ ملاقات کیتی،سعودی ولی عہد نے وزیراعظم نوں منصب سنبھالن اُتے مبارکباد دتی تے نیک خواہشاں ظاہرکیتاں۔اعلامیہ مطابق وزیراعظم نے سعودی عرب دی غیر متزلزل حمایت تے مہمان نوازی اُتے سعودی ولی عہد دا شکریہ ادا کیتا، وزیراعظم نے دوناں پاسیاں دے تعلقات تے اقتصادی تعاون نوں ودھان لئی پاکستان دے عزم داعہدکیتا۔ملاقات وچ ہون والی گل بات دا محور دوناں ملکاں دے وچکار برادرانہ تعلقات نوںہور مضبوط بنان تے مختلف شعبیاں وچ تعاون نوں ودھان دے رستے تلاش کرنا سی، ملاقات وچ پاکستان دی معیشت وچ سعودی عرب دے تعاون نوں سراہیا گیا، دوناں ملکاں دے وچکار کاروبار تے سرمایہ کاری بارے تعاون ودھان دے باہمی عزم دا وی اظہارکیتا گیا۔