لہور:پنجابی یونین دی چھترچھاویں پنجاب ہائوس وچ’’روزنامہ خبریں‘‘ دے بانی ضیا شاید مرحوم دی تریجی برسی اُتے الیاس گھمن،مدثر اقبال بٹ،ندیم رضا،احمد رضا وٹو،کلیان سنگھ کلیان، زاہد حسن،قاضی طارق عزیز،بلال مدثر بٹ، ممتاز ملک تے ندیم باہو خطاب کر رہے نیں

لہور(پنجابی میڈیا)پنجابی یونین دی چھتر چھاویں پنجاب ہائوس وچ معروف صحافی تے ’’روزنامہ خبریں‘‘ دے بانی ضیا شاہد مرحوم دی تریجی برسی اُتے اک خصوصی تقریب دا پربندھ کیتا گیا جس دی صدارت قائد پنجابی تحریک چوہدری محمد الیاس گھمن ہوراں کیتی۔ تقریب نال خطاب کردیاں ہویاں میزبان تقریب تے چیئرمین پنجابی میڈیا گروپ مدثر اقبال بٹ ہوراں ضیا شاہد نوں اک عظیم صحافی قرار دتا تے آکھیا کہ ضیا شاہد نے صحافت نوں نوا اندازدتا۔اونہاں نے ’’روزنامہ پاکستان‘‘ تے’’روزنامہ خبریں‘‘ نوں اوس دور وچ کامیاب اخبار بنایا جَد کسی تریجے اخبار دااجرا ناممکن سی۔ اونہاں نے آکھیا کہ ضیا شاہد دی پنجابی زبان نال محبت دا نتیجہ سی کہ اونہاں نے اک پنجابی اخبار’’خبراں‘‘ دا اجرا کیتا مگر حکومت دی عدم سرپرستی پاروں اوہ جاری نہ رہ سکیا۔ مدثر اقبال بٹ نے ضیا شاہد دے جانشین امتنان شاہد نوں مشورہ دتا کہ اوہ ضیا شاہد دی سوچ نوں مکمل کرن لئی ’’روزوار خبراں‘‘ دا دوبارہ شروع کرن۔ ایس ضمن وچ ’’پنجابی میڈیا گروپ‘‘ تے ’’روزوار بھلیکھا‘‘سارے ٹیکنیکل تے افرادی سپورٹس فراہم کرن لئی تیار اے۔لمز یونیورسٹی وچ پنجابی دے پروفیسر ڈاکٹر زاہد حسن نے ضیا شاہد نوں عہد حاضر دا جید صحافی قرار دیندیاں ہویاں آکھیا کہ ضیا شاہد نے’’جہاں ظلم وہاں خبریں‘‘ دے نعرہ نال لکھاں لوکاں نوں انصاف فراہم کرن دی کوشش کیتی، گورنمنٹ کالج یونیورسٹی دے پروفیسر ڈاکٹر کلیان سنگھ کلیان نے ضیا شاہد نوں اک صحافتی یونیورسٹی قرار دتا تے آکھیا کہ موجودہ دور وچ صحافیاں دی اک وڈھی تعداد نے ضیا شاہد نال صحافت دی ابجد سیکھی اے۔ نیوزپیپرز اینڈ پرائیڈیکل ایسوسی ایشن دے کنوینر قاضی طارق عزیز نے آکھیا کہ ضیا شاہد اونہاں دے استاد سن۔ اونہاں نے اونہاں دے نال کم کیتا تے اونہاں دی رہنمائی وچ صحافت دے بوہت سارے زینے طے کیتے۔ صدر پنجابی میڈیا گروپ تے سینئر صحافی ندیم رضا نے ضیا شاہد نوں جدید صحافت دا امام قرار دیندیاں ہویاں اونہاں دی صحافتی کامیابیاں نوں سراہیا تے آکھیا کہ ضیا شاہد نے صحافت وچ بے شمار نویاں جہتاں متعارف کروائیاں۔اونہاں دیاں تحریراں اپنے اندر جس طرح دھڑکدا ہویا دل رکھدیاں سن۔تُسی اونہاں دا کالم پڑھ لوویا ایڈیٹ کیتا ہوا اخبار ویکھ لوو،حرف حرف خود دسے گا کہ اوہ ضیا صاحب دی تخلیق اے تقریب دے صدر چوہدری الیاس گھمن نے ضیا شاہد دی پنجابی زبان ادب بارے خدمتاں نوں سراہیا تے ایس گل اُتے زوردتا کہ پنجابی صحافت وچ ’’روزوار خبراں‘‘ ناں دا جیہڑا پودا اونہاں نے لایا اونہاں دے وارثاں نوں زندہ رکھنا چاہیدا۔ ایس سلسلہ وچ پنجابی زبان ادب نال وابستہ لوگ تے انتظامیہ اپنیاں کوششاں تے وسائل پیش کرن نوں تیار نیں۔ اونہاں نے آکھیا کہ ضیا شاہد نوں صحافتی دنیا وچ ہمیشہ یاد رکھیا جائے گا تے اونہاں دی جرات’’بے باکی تے ظلم وجبر دے خلاف توانا آواز مظلوم افراد لئی حوصلے دا سبب بنے گی۔ تقریب نال بلال مدثر بٹ تے احمد رضا پنجابی نے وی خطاب کیتا۔ تقریب وچ ندیم باہو تے عنایت عابد نے عارفانہ کلام پیش کیتا جدکہ نقابت دے فرائض حافظ ممتاز ملک نے انجام دتے۔ تقریب دے آخیر اُتے پنجاب ہائوس ولوں رَلتیاں دے اعزاز وچ شاندار عصرانہ دا بندوبست کیتا گیا سی جدکہ مرحوم ضیا شاہد لئی بلندی درجات دی دعا کیتی گئی۔