بانی پی ٹی آئی چھیتی رہا ہون گے، ایہ حکومتاں ختم ہون گیاں،عمرایوب

کوئٹہ(بیورورپورٹ)اپوزیشن لیڈر تے پی ٹی آئی دے مرکزی جنرل سیکرٹری عمرایوب نے آکھیا اے کہ بانی پی ٹی آئی بوہت چھیتی رہا ہون گے، ایہ حکومتاں ختم ہون گیاں۔کوئٹہ وچ پریس بریفنگ دے دوران عمر ایوب دا کہنا سی کہ ملک بھر وچ جلسے کراں گے، ساڈھی تحریک حکومت نوں پاش پاش کردیوے گی،فارم47اُتے بنن والیاں حکومتاں ریت دے پہاڑنیں، ایہ حکومتاں ختم ہون گیاں، آن والی حکومت پی ٹی آئی دی اے۔اونہاں نے آکھیا کہ سویلین دا ٹرائل ملٹری کورٹس وچ نہیں ہونا چاہیدا، ملٹری کورٹ وچ ساڈھے106قیدی نیں،فارم47اُتے بنن والی حکومت بیساکھیاں اُتے کھڑی اے، شریف خاندان قیدی نمبر804 توں خوفزدہ اے۔اپوزیشن لیڈر دا کہنا سی کہ بانی پی ٹی آئی نے عوام وچ شعور بیدار کیتا، آئین تے قنون دی بالادستی لئی تحریک داون پوائنٹ ایجنڈااے، سخت حالات وچ پارٹی سنبھالن والیاں نوں خراج تحسین پیش کرداہاں۔