بشری بی بی نوں قید تنہائی وچ رکھنا اک طرح داتشدد اے،اسلام آباد ہائیکورٹ

اسلام آباد(بیورورپورٹ)اسلام آباد ہائیکورٹ نے ریمارکس دتے کہ بشری بی بی نوں قید تنہائی وچ رکھنا اک طرح دا تشدد اے۔اسلام آباد ہائیکورٹ دے جسٹس میاں گل حسن اورنگزیب نے بشری بی بی نوں بنی گالہ توں اڈیالہ جیل منتقل کرن دی درخواست اُتے سماعت کیتی، بشری بی بی ولوں وکیل عثمان ریاض گل تے خالد یوسف چودھری عدالت پیش ہوئے۔دوران سماعت سٹیٹ کونسل نے 1ہفتے دا ویلا منگیا تے عدالت نے استدعا منظور کر لئی۔سٹیٹ کونسل نے آکھیا کہ سب جیل دے قیام بارے اسیں اپنے طور اُتے ویکھ رہے ہاں کہ کوئی چیز غیر قنونی تے نہیں جس لئی کجھ ویلا چاہیدا۔عدالت نے ریمارکس د تے کہ چیف کمشنر خود نوں کسطرح صوبائی حکومت قرار دے سکدااے، تُسی اونہاں نوں قید تنہائی وچ رکھیا ہویا اے،ایہ اک طرح دا تشدد اے، ایس کیس وچ 1رٹ تے6متفرق درخواستاں آئیاں ہویاں نیں۔عدالت نے بشری بی بی دے وکیلاں توں آئندہ سماعت اُتے تحریری دلائل جمع کر اندیاں ہویاں آکھیا کہ اسیں چاہندے ہاں کہ ایس کیس وچ ہن تک ہورلیٹ نہ ہوئے ۔بعد وچ عدالت نے سٹیٹ کونسل لئی ویلا منگن دی استدعا منظور کر کے سماعت اگلے ہفتے تک ملتوی کر دتی۔