ضمنی الیکشن وچ ڈبے پہلاں توں بھرے ہوئے سن،عمران خان

راولپنڈی(بیورورپورٹ)بانی پی ٹی آئی عمران خان نے آکھیا اے کہ پنجاب داالیکشن پہلاں توں پلان سی تے ضمنی الیکشن وچ پہلاں ہی ڈبے بھرے ہوئے سن۔اڈیالہ جیل وچ میڈیا نال گل بات کر دیاں اونہاں نے آکھیا کہ جمہوریت، قنون دی بالادستی تے فری اینڈ فیئر الیکشن اُتے کھڑی ہندی اے مگر ایتھے جنگل دا قنون اے پنجاب دے ضمنی الیکشن وچ پلس نے مداخلت کیتی پنجاب دا ضمنی الیکشن پلس نے لڑیا اے خیبر پختونخوا وچ وی الیکشن ہوئے پلس نے کِدھرے کوئی ایف آئی آر نہیں کٹی تے نہ ہی دھاندلی ہوئی۔اونہاں نے آکھیا کہ ملک وچ کوئی جمہوریت نہیں ایہ 8فروری توں ڈرے ہوئے سن، اکتوبر توں فروری تک الیکشن صرف پی ٹی آئی نوں کرش کرن لئی ملتوی کیتے گئے، سپریم کورٹ وچ وی ساڈھی پٹیشن ایس لئی نہیں سنی گئی کہ اوہ وی پی ٹی آئی دے کرش ہون دا انتظار کررہی سی۔اونہاں دا کہنا سی کہ پی ٹی آئی دا ناں ختم کرن لئی ہر حربہ استعمال کیتا گیا، ملک وچ اخلاقیات نوں ختم کر کے اکثریت نوں اقلیت وچ تبدیل کر دتا گیا، پنجاب دا الیکشن پہلاں توں پلان سی تے ضمنی الیکشن وچ پہلاں ہی ڈبے بھرے ہوئے سن۔عمران خان نے آکھیا کہ ملک وچ ادارے آئینی طور اُتے نہیں چل رہے صرف طاقتور دی حکمرانی اے، بیرون ملک وسدے پاکستانی سرمایہ کاری کرن تے آئی ایم ایف دی لوڑ نہیں پئے گی، بیرون ملک وسن والے پاکستانی ایتھے پیسہ ایس لئی نہیں لیانداکہ اوس نوںکوئی تحفظ نہیں، مستحکم حکومت لئی جمہوریت ضروری اے جیہڑاصرف شفاف الیکشن ذریعے ممکن اے۔بانی پی ٹی آئی نے آکھیا کہ ملک دا موجودہ سیٹ اپ پاکستان دے فیوچر نوںنقصان پہنچا رہیا اے، میررے نال ڈیل دی نہ کسی نے کوئی گل کیتی نہ کوئی پیغام آیا، سوال ایہ اے کہ اوہ میرے نال کس گل اُتے ڈیل کرن گے؟ 8فروری نوںجَد پبلک اک پاسے کھڑی ہوگئی تے اوہ ویلا سی گل کرن دا ملک دی عوام اک پاسے کھڑی ہو جائے تے کیا اوس توں کوئی جت سکدا اے؟عمران خان نے آکھیا کہ عدلیہ توں لوکاں دا اعتماد اٹھتا جارہیا اے اپنے عوامی نمائندے دا االیکشن بنیادی حق اے جیہڑا کہ عوام توںکھو لیا گیا اے، میری بیوی دا سیاست نال کوئی تعلق نہیں لیکن اوس نوں سزا دلوا کے اک کمرے وچ بند کر دتا گیا اے، میریاں تیناں بہناں خلاف مقدمے درج کیتے گئے، مریم نواز تے بے نظیر سیات دان نیں مگر میری گھروالی دا سیاست نال کوئی تعلق نہیں۔اونہاں نے ہور آکھیا کہ ساڈھے سعودی عرب دے نال تعلقات چنگے سن ایسی لئی ساڈھے دور وچ او آئی سی فارن منسٹر کانفرنس ہوئی۔