معیاری تعلیم دا ودھااولین ترجیح،کوشش اے کوئی بال سکولوں باہرنہ ہوئے،وزیراعظم

اسلام آباد(بیورورپورٹ)وزیراعظم محمد شہباز شریف نال برطانیہ دی معروف جامعات دے نمائندیاںنے ملاقات کیتی، وفد دی قیادت برطانیہ دے انٹرنیشنل ایجوکیشن چیمپئن سراسٹیو سمتھ نے کیتی۔وزیراعظم شہبازشریف نے آکھیا کہ معیاری تعلیم دا ودھا ساڈھی حکومت دی اولین ترجیح اے، ساڈھی بھرپور کوشش اے کہ کوئی وی بال سکولوں باہر نہ ہوئے، ایس حوالے نال وفاقی حکومت صوبائی حکومتاں دے نال مل کے کم کر رہی اے۔وزیراعظم نے ہور آکھیا کہ پنجاب وچ ایجوکیشن اینڈومنٹ فنڈ قائم کیتا سی، ایسی قسم دے اقدام وفاق وچ وی کراں گے، تعلیمی شعبے دی ترقی لئی حکومت ہنگامی اقدام کر رہی اے، پاکستان تے برطانیہ دے تعلقات دہائیاں اُتے محیط نیں جنہاں وچ ویلے دے نال نال ہور بہتری آرہی اے۔شہبازشریف نے برطانیہ ولوں پاکستان وچ تعلیمی شعبے لئی تعاون نوں سراہندیاں ہویاںآکھیا کہ برطانیہ دے نال تجارت تے تعلیمی شعبیاں وچ تعاون ودھان دی خواہش اے، پاکستان تے برطانیہ دی یونیورسٹیاں دے وچکار ٹیکنالوجی تے تحقیقی شعبیاں وچ اشتراک ہونا چاہیدا اے۔وزیراعظم دا کہنا سی کہ برطانیہ پاکستانی استاداں دی تربیت تے استعداد کار وچ ودھان بارے مدد گار ثابت ہوسکدا اے، پاکستان برطانیہ دے تعلیمی شعبے دی استعداد توں فائدہ چُکنا چاہندا اے، ایہ کم خوش آئند اے کہ پاکستانی تے برطانوی جامعات ریسیپروکل بنیاداں اُتے ڈگری پروگرام شروع کر چکی اے۔اونہاں نے ہورآکھیا کہ اعلی تعلیم دے ودھا تے اوس دا معیار بہتر بنان لئی برطانیہ دے تعلیمی شعبے دے نال مل کے کم کرنا چاہندے ہاں، جدید تعلیم بالخصوص سائنس تے ٹیکنالوجی کسی وی قوم دی ترقی دی ضمانت اے، برطانیہ ایجوکیشن گیٹ وے پاکستان دا دائرہ کارہورودھا رہیا اے۔وفد نے برطانیہ تے پاکستان دے وچکار اعلی تعلیمی شعبے وچ اشتراک تے تعاون بارے گہری دلچسپی ظاہرکیتی۔