اپوزیشن دی درخواست منظور، پی ٹی آئی فنڈنگ کیس دی روزانہ سماعت دا فیصلہ

اسلام آباد: الیکشن کمیشن نے پارٹی فنڈنگ کیس دی روزانہ دی بنیاد تے سماعت دی اپوزیشن دی درخواست منظور کر لئی۔

چیف الیکشن کمشنر دی عدم موجودگی وچ الیکشن کمیشن دے 2ارکان نے تحریک انصاف دے خلاف غیر ملکی تے ممنوعہ پارٹی فنڈنگ کیس دی روزانہ دی بنیاد تے درخواست دی سماعت کیتی، الیکشن کمیشن نے اپوزیشن دی درخواست منظور کر لئی۔

اپوزیشن جماعتاں دی درخواست چیف الیکشن کمشنر تے ارکان نوں بھجوا دتی گئی اے جد کہ 26نومبر توں پی ٹی آئی پارٹی فنڈنگ کیس دی کاروائی روزانہ دی بنیاد تے چلے گی۔

یاد رہوے کہ پچھلے دیہاڑ اپوزیشن جماعتاں دی رہبر کمیٹی دے ارکان نے الیکشن کمیشن دفتر دے ساہمنے احتجاج وی کیتا سی تے پی ٹی آئی دے خلاف کیس دی روزانہ سماعت دا مطالبہ کیتا، رہبر کمیٹی دے کنوینراکرم درانی نے آکھیا غیر ملکی فنڈنگ کیس 5ورھے توں چل رہیا اے، فیصلہ ہو گیا تے پی ٹی آئی تے ایہدی حکومت ختم ہو جاوے گی۔