وزیراعلیٰ پنجاب تے سپیکر چودھری پرویز الٰہی دی ملاقات، اختلافات دیاں خبراں دی نفی کر دتی

لہور: وزیراعلیٰ پنجاب عثمان بزدار تے سپیکر چودھری پرویز الٰہی نے ملاقات وچ اختلافات دیاں خبراں دی نفی کر دتی، پرویز الٰہی بولے کوئی غلط فہمی وچ نہ رہوے، تحریک انصاف دے اتحادی آں تے رہواں گے، اتحاد وچ رخنہ پان والیاں دی خواہش دلاں وچ ای رہ جاوے گی۔

سرکار تے اتحادی جماعت وچ اختلافات دیاں افواہواں دم توڑ گئیاں، سپیکر پنجاب اسمبلی چودھری پرویز الٰہی دی ایوان وزیراعلیٰ آمد تے وزیراعلیٰ پنجاب عثمان بزدار نال ملاقات ہوئی، ورکنگ ریلیشن شپ نوں ہور مستحکم کرن تے اتفاق کیتا گیا۔ وفاقی وزیر ہاؤسنگ طارق بشیر چیمہ تے رکن قومی اسمبلی مونس الٰہی وی ملاقات وچ موجود رہے۔ چودھری پرویز الٰہی دا کہنا سی وزیراعلیٰ پنجاب دے نال کھڑے ساں، کھڑے آں تے کھڑے رہواں گے۔ کوئی غلط فہمی وچ نہ رہوے، تحریک انصاف دے اتحادی آں تے اتحاد پہلاں توں ودھ پکا اے۔ عثمان بزدار نے پنجاب اسمبلی دی کاروائی احسن طریقے نال چلان تے سپیکر پرویز الٰہی نوں خراج تحسین پیش کیتا، آکھیا عوام دی ترقی و خوشحالی لئی رل کے کم کر رہے آں تے کردے رہواں گے۔ غلط فہمیاں پیدا کرن دیاں سازشاں کرنے والے کدی کامیاب نہیں ہون گے۔

پنجاب دی ترقی دے سفر وچ اتحادیاں نوں نال لے کے چلاں گے۔ دوواں اتحادیاں نے اتفاق کیتا ہر مسئلے نوں افہام و تفہیم نال حل کرن وچ ای دانشمندی اے۔