سموگ دا زور، لہور سنے وکھو وکھ شہراں وچ جمعہ نوں سکولاں وچ چھٹی دا اعلان

لہور: محکمہ سکولز ایجوکیشن نے شدید فضائی آلودگی دی وجہ توں لہور، فیصل آباد تے گوجرانوالہ دے سرکاری تے نجی سکولاں وچ مورخہ 22نومبر بروز جمعہ نوں تعطیل دا اعلان کر دتا اے۔ سرکاری اعلان دے بعد سارے تعلیمی ادارے جمعہ نوں بند رہن گے۔

خیال رہوے کہ ایس توں پہلاں پچھلے جمعہ نوں وی سموگ دی ودھدی صورتحال دے پیش نظر محکمہ سکولز ایجوکیشن نے چھٹی دا اعلان کیتا سی۔

محکمہ موسمیات دے مطابق لہور 279ایئر کوالٹی انڈیکس دے نال فضائی آلودگی وچ دوجے نمبر تے آ گیا، سب توں ودھ اے کیو آئی پنجاب اسمبلی دے آسے پاسے 612ریکارڈ کیتا گیا۔

پنجاب دے دوجے شہراں وچ وی دھند تے سموگ دے بادل چھائے رہے، گوجرانوالہ وچ ایئر کوالٹی انڈیکس 444، فیصل آباد دا494تے ملتان وچ 164ریکارڈ کیتا گیا۔ دوجے پاسے علامہ اقبال انٹرنیشنل ایئر پورٹ تے دھند تے سموگ دی وجہ توں حد نگاہ 300میٹر تک رہ گئی۔ سموگ تے دھند دی وجہ توں ارمچی، دوحہ تے دمام توں آن والی پروازاں دا رخ اسلام آباد ول موڑ دتا گیا۔ محکمہ موسمیات دا کہنا اے اگلے 48گھنٹیاں دے دوران بارش دا کوئی امکان نہیں اے۔