بلوچستان حکومت، چیئرمین سینیٹ تے گورنر کے پی کے دی پیشکش ہوئی اے: فضل الرحمان

ڈیرہ اسماعیل خان: جمعیت علمائے اسلام (ف) دے سربراہ مولانا فضل الرحمان دا کہنا اے سانوں بلوچستان حکومت، چیئرمین سینیٹ تے گورنر کے پی کے دی پیشکش ہوئی اے جہنوں اسیں رد کر دتا اے۔ ڈیرہ اسماعیل خان وچ پریس کانفرنس دے دوران جمعیت علمائے اسلام (ف) دے سربراہ مولانا فضل الرحمان دا کہنا سی حکومت دے خلاف ساڈی تحریک برقرار رہوے گی ، نویں الیکشن تے حکومت دے خاتمے دی جلدی نوید عوام نوں ملے گی، عوامی قوت نال ملکی نظام بند کیتا جا سکدا اے۔

اوہناں آکھیا اسلام آباد مارچ ہن ملک دے دوجے حصیاں تک پھیل چکیا اے، نویں سرے توں چوناں ہون گیاں تے عوامی نمائندہ حکومت تشکیل دتی جاوے گی ایس لئی وزیراعظم کول کوئی راہ نہیں استعفیٰ دینا ای پوے گا۔ فضل الرحمان آکھیا حکومت بوکھلاہٹ دا شکار اے، وزیراعظم دی تقریر وچ جہڑے الفاظ استعمال ہوئے اوہ ایہناں دے شایان شان نہیں، اسیں ملکی ترقی چاہنے آں پر موجودہ حکومت وچ ترقی سکڑ گئی اے۔ اوہناں آکھیا عوام دی قوت خرید بالکل ختم ہو گئی اے، اجہی حکومت نوں ہور ویلا نہیں دتا جاوے گا جد کہ اوراں نوں چور کہن والے ہن احتساب توں ڈر رہے نیں۔