نیپالی قومی اسمبلی نے بھارت دے زیر قبضہ علاقے دا نواں نقشہ منظور کر لیا

کھٹمنڈو: نیپال دی قومی اسمبلی نے نواں نقشہ منظور کر لیا اے جہدے وچ بھارت دے زیر قبضہ علاقے نوں اپنی حدود دا واضح حصہ وکھایا گیا اے۔ بھارت نے اپنی مذموم توسیع پسندانہ حکمت عملی تے عمل کردیاں ہوئیاں ایس ویلے 4گوانڈھی ملکاں پاکستان، چین، نیپال تے بنگلہ دیش دے نال سرحداں تے چھیڑ چھاڑ شروع کر رکھی اے، کجھ دن پہلاں بھارت ولوں ایسے طرح دی اک سرحدی خلاف ورزی دے دوران چینی فوج دے ہتھوں کرنل سنے 20ہندوستانی فوجی مارے گئے سن۔ بھارت نے نیپال دے کجھ سرحدی علاقیاں تے زبردستی قبضہ کرکے شاہراہ تعمیر کر رکی اے جہدے تے نیپال ولوں سخت ردعمل دتا گیا، ہن نیپالی پارلیمنٹ نے نواں نقشہ منظور کیتا اے جہدے وچ بھارت دے زیر تسلط علاقے نوں زیادہ واضح طور تے اپنی حدود دا حصہ وکھایا گیا اے۔ نیپال دے ایوان بالا نے نویں نقشے دے ترمیمی بل دی متفقہ منظوری دتی جہدے بعد ترمیمی نقشے دا بل ہن نیپالی صدر نوں گھلیا جائے گا ۔ نویں نقشے وچ متنازعہ علاقے کالا پانی، لیپولیکھ تے لمپیادھورا شامل نیں۔ بھارت وچ نیپال دے اقدام تے خاصی پریشانی پائی جاندی اے تے بھارتی میڈیا نے نیپال دے خلاف نویں سرے توں منفی پروپیگنڈا شروع کر دتا اے۔