مقبوضہ کشمیر دی آزادی تک کشمیریاں دی حمایت جاری رکھاں گے: وزیراعظم

اسلام آباد: وزیراعظم عمران خان دا کہنا اے پاکستان مقبوضہ کشمیر دی بھارتی غیر قنونی قبضے توں آزادی تک ایس جدوجہد دی حمایت جاری رکھے گا۔ یوم شہدائے کشمیر دی مناسبت نال اپنی ٹوئٹ وچ وزیراعظم آکھیا یوم شہداء کشمیر تے اسیں کشمیریاںنوں غیر قنونی تے وحشیانہ بھارتی قبضہ دے خلاف جدوجہد تے سلام پیش کرنے آں، 13جولائی 1931دے شہداء اج دے کشمیری مزاحمت کاراں دے آباؤ اجداد سن، ایہناں دی اولاد نے نسل در نسل اپنی آزادی لئی اپنی جاناں نچھاور کیتیاں۔ وزیراعظم عمران خان آکھیا اج کشمیری عوام آبادیاتی انجینئرنگ دے راہیں ہندوتوا بالادستی دے ساہمنے بہادری نال لڑ رہے نیں، پاکستان ہمیشہ کشمیریاں دے حق خود ارادیت لئی کھڑا رہیا اے، مقبوضہ کشمیر دی بھارتی غیر قنونی قبضے توں آزادی تک پاکستان ایس جدوجہد دی حمایت جاری رکھے گا، مقبوضہ کشمیر دی بھارتی قبضے توں آزادی دا دن دور نہیں اے۔