سپریم کورٹ نے حکومت نوں شوگر ملز دے خلاف کارروائی دی اجازت دے دتی

اسلام آباد: سپریم کورٹ نے حکومت نوں شوگر ملز دے خلاف کارروائی دی اجازت دیندیاں ہوئیا سند ھ ہائی کورٹ دا حکم امتناع خارج کر دتا ۔سپریم کورٹ نے حکومت نوں شوگر ملز مالکان دے خلاف غیر ضروری اقدامات نہ کرن دی ہدایت کردیاں ہوئیاں آکھیا کہ حکومت تے ادارے قانون دے مطابق کارروائی کرن ، سندھ تے اسلام آباد ہائی کورٹ 3ہفتے دے اندر شوگر ملز دی درخواستاں اُتے فیصلہ کرن ، حکومت عدالتی فیصلیاں تک شوگر ملز دے خلاف کوئی حتمی حکم نہیں جاری کر سکدی ،عدالت نے شوگر کمیشن رپورٹ اُتے حکومتی عہدیدارن نوں بیان بازی توں وی روک دتا۔ شوگر ملز دے وکیل نے اعتراض کیتا کہ حکومتی وزراء بیان بازی کر کے میڈیا اُتے ٹرائل کردے نیں ۔ چیف جسٹس نے آکھیا کہ بیان بازی سیاسی معاملہ اے زیادہ مداخلت نہیں کر سکدے۔اٹارنی جنرل نے آکھیا کہ ایہ پہلا کمیشن اے جس اندر دو وزرائے اعلیٰ پیش ہوئے ، وزیر اعظم دے قرین ترین ساتھی نوں وی کمیشن اندر پیش ہونا پیا، کیہ گل 20شوگر ملاں آسمان توں اُتریاں نیں کہ اوہناں دے خلاف کارروائی نہیں ہو سکدی ، حکومت چینی توںبعد پیٹرول بحران اُتے وی کمیشن بنا رہیی اے ، سندھ ہائی کورٹ نے جس طرح کارروائی توں روکیا او قانون دے خلاف اے او چاہندے نیں کہ پیٹرول کمیشن توں پہلاں حکم امتناع والا مسلہ حل ہوئے۔ جسٹس اعجاز الاحسن نے ریمارکس دتا کہ شفاف کم ہونے چاہیدے نیں تاکہ ملوث لوکاں نوں کیفر کردار تک پہچایا جائے ، تکنیکی معاملات وچ عوام دا مفاد پیچھے نہیں رہن دیاں گے۔