پی ٹی آئی حکومت10ہزار ارب دا قرضہ لے چکی اے

اسلام آباد: اسٹیٹ بینک دی تازہ ترین رپورٹ دے مطابق وفاقی حکومت دا قرض مئی دے آخر تک اوسطاََ 14.2ارب یومیہ دے حساب نال 34.5کھرب روپئے ہو گیا، وفاقی حکومت دا 34.5کھرب روپئے دا قرض اوہناں واجبات تو علاوہ اے جس لئی حکومت بالواسطہ قرض دہندگان دے مقروض اے۔ ایس طرح مجموعی ملکی قرضہ مرکزی حکومت دے قرض توں کئی گنا ودھ اے جس دے اعدادوشمار اگلے مہینے آون گے ۔ مثال دے طور تے مارچ2020ء دے آخیر تک مجموعی ملکی قرضہ ودھ کے35.2کھرب روپئے ہو چُکیا اے ، پچھلے مئی اندروفاقی حکومت دا قرض مرکزی بینک تے سرکاری شعبہ دے کاروباری اداریاں دے قرض تے واجبات دے علاوہ 29.8کھرب سی ، سالانہ بنیاداں اُتے کرنسی دی قدر اندر کمی ، ٹیکس محصولات اندر عارضی کمی تے کورونا وائرس دے تدارک لئی غیر متوقع اخراجات دی وجہ نال وفاقی حکومت دا قرض15.8فیصد یا4.7کھرب روپئے ودھ گیا۔ضمنی گرانٹ دی بجٹ کتاب توں اے ظاہر ہندا اے کہ پاکستان تحریک انصاف دی حکومت نے پچھلے مالی سال دے دوران مئی توں جون اندر جو قرضہ لیا اوس اندر کورونا لئی289.4ارب خرچ کیتے گئے جو کہ6فیصد بن دا اے ۔پی ٹی آئی دی حکومت اقتدار وچ آون توں بعد مجموعی طور تے ملکی قرضیاں اندر10.2ٹریلین روپئے توں وی ودھ دا اضافہ کر چکی اے ، قرضیاں اندر44فیصد دا اضافہ ملک لئی انتہائی تویش ناک اے ۔