سپریم کورٹ نے سوشل میڈیا تے یو ٹیوب اُتے قابل اعتراض مواد دا نوٹس لے لیا

اسلام آباد: سپریم کورٹ نے سوشل میڈیا تے یو ٹیوب اُتے قابل اعتراض مواد دا سخت نال نوٹس لے لیا ، عدالت نے پاکستان وچ یو ٹیوب بند کرن دا عندیہ دے دتا ۔جسٹس قاضی امین نے ریمارکس دیندیاں ہوئیاں آکھیا کہ سانوں آزادی اظہار رائے توں کوئی مسئلہ نیں ، عوام دے پیسے دی تنخواہ لیندے واں ، ساڈی کارکردگی تے فیصلے اُتے عوام نوں گل کرن دا حق اے ، نجی زندگی دا حق وی ساہنوںآئین دیندا اے ۔جسٹس قاضی امین نے آکھیا کہ اسی صبر دا مطاہرہ کر رہیے آں ، آخر کدوں تک صبر دا مظاہرہ کراں گے ، یو ٹیوب تے سوشل میڈیا اُتے ساڈے خانداناں نوں وی نہیں بخشیا جا رہیا ۔کوئی یو ٹیوب اُتے چاچا تے کوئی ماما بن کے بیٹھ گیا اے ، کل اسی فیصلہ دتا تے او یو ٹیوب اُتے شروع ہو گیا ، آرمی ، عدلیہ تے حکومت دے خلاف لوکاں نوں اُکسایا جا رہیا اے ۔پی ٹی اے حکام نے عدالت نوں آکھیا کہ انفرادی مواد نوں اسی نہیں ہٹا سکدے ، صرف رپورٹ کر سکدے آں ، جسٹس مشیر عالم نے ریمارکس دتے کہ کئی ملکاں وچ یو ٹیوب بند اے ، امریکہ تے یورپی یو نین دے خلاف یو ٹیوب اندر اپ لوڈ کر کے وکھائو۔ جسٹس قاضی امین نے آکھیا کہ ایسے جُرم دے مر تکب لوکاں دے خلاف کارروائی ہوئی ؟ کئی ملکاں اندر سوشل میڈیا نوں مقامی قوانین دے تحت کنٹرول کیتا جاندا اے ۔ سپریم کورٹ نے وزارت خارجہ تے اٹارنی جنرل نوں نوٹس جاری کر دتا ۔