قومی مالیاتی کمیشن توں مشیر خزانہ حفیظ شیخ نوں کڈھ دتا گیا

اسلام آباد: این ایف سی دی تشکیل تے وفاقی حکومت نے یوٹرن لے لیا۔ وفاقی حکومت نے مشیر خزانہ حفیظ شیخ نوں این ایف سی توں کڈھ دتا جہدے بعد اسلام آباد ہائی کورٹ نے قومی مالیاتی کمیشن دی تشکیل دے خلاف ن لیگ دی عرضی نبیڑ دتی۔ اسلام آباد ہائی کورٹ دے جسٹس میاں گل حسن اورنگزیب نے قومی مالیاتی کمیشن دی تشکیل دے خلاف ن لیگ دی عرضی تے سنوائی کیتی۔ ایس موقع تے اٹارنی جنرل نے این ایف سی دی تشکیل دا نواں نوٹیفکیشن اسلام آباد ہائی کورٹ وچ پیش کر دتا جہدے بعد قومی مالیاتی کمیشن دی تشکیل دے خلاف ن لیگ دے انجینئر خرم دستگیر دی عرضی نبیڑ دتی۔ اٹارنی جنرل خالد جاوید خان نے دسیا جہڑے نوٹیفکیشن نوں چیلنج کیتا گیا اوہ سرکار نے واپس لے لیا، سرکار نے ہن نواں نوٹیفکیشن جاری کدتا اے، نویں نوٹیفکیشن دے مطابق مشیر خزانہ حفیظ شیخ نوں کمیشن وچ شامل نہیں کیتا گیا۔ ن لیگ دے وکیل بیرسٹر محسن شاہنواز رانجھا آکھیا ساڈا اعتراض سی کہ ساڈے توں مشاورت دے بغیر مالیاتی کمیشن تشکیل دتا گیا ساڈی ایہ کامیابی اے سرکار نوں اسیں آئین دے تحت کم کرن تے مجبور کیتا۔ اٹارنی جنرل آکھیا پرانے مالیاتی کمیشن دی تشکیل دے نوٹیفکیشن تے مینوں وی اعتراض سی۔