غیر ملکی میڈیا دے وفد دا لائن آف کنٹرول دا دورہ

اسلام آباد: پاکستان دی اجازت دے بعد غیر ملکی میڈیا دے وفد نے لائن آف کنٹرول دا دورہ کیتا پر بھارت نے دورہ دی اجازت دین توں انکار کر دتا۔ بھارت نے اک وار فیر غیر ملکی میڈیا نوں ایل او سی دا دورہ کرن دی اجازت دین توں انکار کر دتا پر ایہدے برعکس پاکستان نے غیر ملکی میڈیا نوں ایل او سی دا پورا دورہ کرن دی اجازت دے دتی اے۔ پاکستان ولوں غیر ملکی میڈیا تے اقوام متحدہ دے فوجی مبصر مشن نوں ایل او سی سنے مقامی آبادی تک پوری رسائی دتی جا رہی اے۔ غیر ملکی صحافی چری کوٹ سیکٹر وچ فائر بندی معاہدے دی بھارتی خلاف ورزیاں دا مشاہدہ کرن گے، متاثرہ بندیاں نال ملن گے تے نقصانات دا جائزہ لین گے۔ دوجے پاسے فرانسیسی صحافی پال کومیٹی نے پاکستان توں لائن آف کنٹرول تک آزادانہ رسائی منگی جہدے تے اوہناں نوں ایل او سی، قبائلی ضلعیاں، واہگی سرحد تک آزادانہ رسائی دے دتی گئی۔ فرانسیسی صحافی پال کومیٹی نوں مقبوضہ کشمیر وچ بھارتی بربریت دی ویڈیو بنان تے 10دسمبر 2017ء نوں سری نگر توں گرفتار کیتا گیا سی ، بعدوں اوہناں نوں ملک بدر کر دتا گیا۔