اپوزیشن ذاتی مفادات دے تحفظ لئی ہتھ پیر مار رہی اے: وزیراعلیٰ پنجاب

لہور: وزیراعلیٰ پنجاب عثمان بزدار آکھیا اے عمران خان دی قیادت وچ موجودہ حکومت پاکستان دی تریخ دی شفاف ترین حکومت اے، اپوزیشن جماعتاں نے اپنے دور وچ کرپشن دے ریکارڈ بنائے، اپوزیشن ذاتی مفادات دے تحفظ لئی ہتھ پیر مار رہی اے۔ عثمان بزدار نے اپوزیشن دی تنقید دے جواب وچ آکھیا 2ورھے وچ کرپشن دا اک وی داغ حکومت دے دامن تے نہیں، پاکستان دی تریخ وچ اجہی شفاف حکومت اج تک نہیں آئی، کرپٹ مافیا دی لٹ مار دی سیاست ہمیشہ لئی دفن ہو چکی اے، سیاست نوں کاروبار بنان والیاں دے دوغلے چہرے عوام دے ساہمنے آ شکار ہو چکے نیں۔ وزیراعلیٰ پنجاب دا ہور کہنا سی کرپشن دے بھار تھلے دبی اپوزیشن نوں عوام نے پہلاں ای رد کیتا تے آئندہ وی کراں گے، اج وی اپوزیشن دی اپنی صفاں دے اندر بھرپور انتشار تے افراتفری اے، دو سال وچ فلاح عامہ دے اوہ کم کیتے نیں جو شو مارن والے 20ورھے نہ کر سکے، لٹ مار دے راستے بند کر دتے نیں۔ عثمان بزدار نے ہور آکھیا اپوزیشن دی منفی سیاست تیزی نال ختم ہو رہی اے، ساڈی سرکار نے وسائل دا رخ عوام ول موڑیا اے، اپوزیشن دے کول گلاں کرن دے سوا کوئی ایجنڈا نہیں، ہن کرپشن تے لٹ مار دا دور واپس نہیں آوے گی، مشکل ویلے وچ عوام نوں کلیاں چھڈن والیاں لئی پاکستان دی سیاست وچ کوئی گنجائش نہیں۔