مودی نے معاشی مفادات دی خاطر پاکستان دی ہر کسے قسم دی پُرامن کوشش رد کیتی: وزیراعظم

اسلام آباد(بھلیکھا ٹی وی ) وزیراعظم عمران خان دا کہنا اے بھارتی وزیراعظم نریندر مودی نے معاشی مفادات دی خاطر پاکستان دی ہر کسے قسم دی پُرامن کوشش نوں رد کیتا۔ قطری نیوزی چینل الجزیرہ نوں انٹرویو وچ وزیراعظم عمران خان دا کہنا سی بھارت دے نال تنازعات نوں ختم کرن دے سارے ممکنہ راہ اختیار کر چکے آں پر بھارتی وزیراعظم نریندر مودی نے معاشی مفادات دی خاطر پاکستان دی ہر کسے قسم دی پُرامن کوشش نوں رد کیتا۔ وزیراعظم دا کہنا سی نریندر مودی نے ہندوتوا دے ایجنڈے نوں اگے ودھان لئی بھارت توں اوہدی سیکولر ازم دی پہچان کھوہ لئی، بھارت آر ایس ایس دے ہندو انتہا پسند نظریے دے زیر اثر اے، اج دے بھارت وچ مسلماناں دے نال اوہی ہو رہیا اے جو ہٹلر دے دور وچ یہودیاں دے نال کیتا گیا۔ اوہناں آکھیا مقبوضہ جموں کشمیر وچ آرٹیکل 370دی منسوخی دے بعد وادی اک اوپن ایئر جیل وچ تبدیل اے، اک سال دے وچ وچ مقبوضہ جموں کشمیر دی معیشت تبا ہ ہو گئی اے۔ وزیراعظم عمران خان نے انٹرویو وچ سعودی عرب تے ایران تنازع بارے گل کردیاں آکھیا پاکستان دی ثالثی دی وجہ توں ایران تے سعودی عرب وچ کشیدگی گھٹ ہوئی اے جد کہ دوواں ملکاں وچکار ثالثی دی کوششاں ختم نہیں ہوئیاں، اسیں بہتری ول ودھ رہے آں۔