سانحہ اے پی ایس دے ذمہ داراں نوں نہیں چھڈاں گے: چیف جسٹس پاکستان

اسلام آباد( بھلیکھا ٹی وی )چیف جسٹس پاکستان جسٹس گلزار نے ریمارکس دتے نیں سانحہ اے پی ایس دے ذمہ داراں نوں نہیں چھڈاں گے۔ چیف جسٹس گلزار احمد دی سربراہی وچ سپریم کورٹ دے فاضل بنچ نے سانحہ آرمی پبلک سکول ازخود نوٹس دی سماعت کیتی۔ سماعت دے موقع تے آرمی پبلک دے شہیداں دے والدین عدالت وچ پیش ہوئے تے آکھیا عدالت توں درخواست اے سانوں انصاف چاہیدا اے۔ واقعے وچ شہید اک بچے دی ماں نے آکھیا پاکستان وچ ساڈے بچے محفوظ نہیں جہدے تے چیف جسٹس نے ریمارکس دتے تہاڈے نال جو ہویا بہت غلط ہویا، انج کسے صورت وی نہیں ہونا چاہیدا سی، مینوں تہاڈے نال بے انتہا ہمدردی اے، پاکستان وچ صرف قنون دی حکمرانی اے، عدلیہ تہاڈی محافظ اے، سانحہ اے پی ایس دے ذمہ داراں نوں نہیں چھڈاں گے۔ غفلت دے مرتکب بندیاں دے نال قنون دے مطابق نبڑاں گے۔ عدالت دے ساہمنے ماپے ولوں واقعے دی تحقیقاتی رپورٹ فراہم کرن دی عرضی تے چیف جسٹس نے ریمارکس دتے ایہ خفیہ رپورٹ اے جہڑی اجے اسیں اٹارنی جنرل نوں فراہم کر رہے آں، سپریم کورٹ آئین تے قنون دے مطابق گل کرے گی، کمیشن اسیں بنایا ایہنوں منطقی انجام تک اپڑاواں گے۔