دیس دا سیاسی نقشہ جاری، مقبوضہ کشمیر پاکستان دا حصہ ظاہر

اسلام آباد( بھلیکھا ٹی وی )وزیراعظم پاکستان عمران خان نے دیس دا سیاسی نقشہ جاری کر دتا جہدے وچ مقبوضہ کشمیر نوں پاکستان دا حصہ ظاہر کیتا گیا اے۔ سرکاری ٹی وی تے قوم نال خطاب کردیاں آکھیا پہلی وار دیس دا سیاسی نقشہ جاری کیتا جا رہیا اے جہڑا پاکستانی و کشمیری عوام تے کشمیری قیادت دی امنگاں دی ترجمان کردا اے۔ اوہناں آکھیا دیس دے سیاسی نقشے دا اجرا کشمیر نوں پاکستان بنان ول پہلا قدم اے۔ اسیں اقوام متحدہ نوں ایہ باور کروا کے رہواں گے کہ تسیں ایس تنازع نوں تسلیم کیتا تے اسیں ایہدے حال دی جدوجہد کردے رہواں گے۔ وزیراعظم نے اعلان کیتا اج دے بعد پورے دیس دے تعلیمی اداریاں دے نصاب سنے ہر تھاں نویں جاری کیتے نقشے دا استعمال کیتا جائے گا۔ اوہناں دا کہنا سی اج تریخ دن اے۔ ایس نقشے دے اجرا نال بھارت دے کشمیر وچ 5اگست نوں کیتے گئے اقدام دی نفی ہوندی اے۔ ایس نقشے نوں پاکستان دی سیاسی جماعتاں تے کشمیری قیادت دی تائید حاصل اے تے وفاقی کابینہ وی ایہدی منظوری دے چکی اے۔ ایس توں پہلاں وفاقی کابینہ دے اجلاس وچ دیس دے سیاسی نقشہ دے اجراء دی منظوری دتی گئی۔ ملکی تریخ وچ پہلی وار دیس دا سیاسی نقشہ جاری کیتا گیا اے۔وزیراعظم دی زیر صدارت وفاقی کابینہ دا اجلاس ہویا جہدے وچ کورنگی فشریز ہاربر اتھارٹی دے بورڈ دی تشکیل نو تے ڈپٹی گورنر اسٹیٹ بینک پاکستان دی منظوری دتی گئی۔کابینہ نوں نیشنل انفارمیشن ٹیکنالوجی بورڈ دی کارکردگی، میڈیا ہاؤسز دے واجبات دی ادائیگیاں تے گیس دی تقسیم دے منصوبیاں تے بریفنگ دتی گئی جد کہ ادارہ جاتی اصلاحات بارے پیشرفت رپورٹ پیش کیتی گئی۔