رمضان شوگر ملز کیس ، شہباز شریف تے حمزہ شہباز اُتے فرد جُرم عائد

لہور( بھلیکھا ٹی وی ) احتساب عدالت نے رمضان شوگر ملز ریفرنس وچ شہباز شریف تے حمزہ شہباز اُتے فرد جرم لا دتی ،دوناں ملزماں نوں صحت جرم توں انکار کر دتا ۔ عدالت نے27اگست نوں وکیلاں دے دلائل طلب کر لئے جد کہ گواہواں نوں شہادتاں لئی بلا لیا ۔احتساب عدالت دے جج امجد نذیر چودھری نے رمضان شوگر ملز کیس اُتے سماعت کیتی ، قومی اسمبلی دے اپوزیشن لیڈر شہباز شریف عدالت دے آمنے ساہمنے پیش ہوئے جد کہ جیل حکام ولوں حمزہ شہباز نوں وی پیش کیتا گیا ۔دوران سماعت شہباز شریف دے وکیل نے فرد جرم عائد کرن دی مخالفت کیتی تے استدعا کیتی کہ تیاری لئی مہلت دیون تے فرد جُرم دی کارروائی موخر کیتی جائے ، عدالت نے ریمارکس دتے کہ ایہ کیس فرد جُرم دی کارروائی لئی فکس اے ، اسی کوئی انعام نہیں دے رہے ، اج 10گھنٹے دلیلاں دیون ، عدالت دلیلاں سُنے گی ۔