انتظامیہ ڈینگی لاروا دی تلفی نوں یقینی بنائے، ڈاکٹر یاسمین راشد دی خصوصی ہدایت

راولپنڈی: صوبائی وزیر صحت ڈاکٹر یاسمین راشد نے حکام تے زور دتا اے ڈینگی وباء تے مکمل قابو پان لئی سارے اداریاں نوں مشترکہ کوششاں کرنی ہون گیاں۔ تفصیل دے مطابق صوبائی وزیر صحت ڈاکٹر یاسمین راشد دی زیر صدارت اعلیٰ سطح اجلاس ہویا جہدے وچ راولپنڈی ڈویژن وچ انسداد ڈینگی مہم دی سرگرمیاں دا جائزہ لیا گیا۔ کمشنر راولپنڈی نے صوبائی وزیر صحت نوں ڈینگی وباء تے قابو پان لئی کیتے گئے اقدامات دی تفصیلات توں آگاہ کیتا۔ ڈاکٹر یاسمین راشد نے سرگرمیاں نوں تیز کرن دی ہدایت کیتی۔ اجلاس نال خطاب وچ اوہناں دا کہنا سی صوبہ بھر وچ ڈینگی وباء دے حوالے نال صورتحال قابو وچ اے۔ ڈینگی تے مکمل قابو پاؤن لئی سارے اداریاں نوں سانجھی کوششاں کرنی ہون گیاں۔ محکمہ صحت پنجاب نے ایس سلسلے وچ خاطر خواہ انتظامات کیتے نیں۔ اوہناں نے ہدایت کیتی سارے کمشنرز تے ڈی سیز انسداد ڈینگی دی سرگرمیاں دی آپ مانیٹرنگ کرن، انتظامیہ ہاٹ سپاٹس دی نشاندہی کرکے ڈینگی لاروا دی تلفی نوں یقینی بنائے جد کہ عوام توں وی حفاظتی تدابیر تے مکمل عملدرآمد کرن دی اپیل کیتی جاندی اے۔