شراب لائسنس کیس: عثمان بزدار نے 4ورقیاں تے مشتمل جواب نیب وچ جمع کرا دتا

لہور( بھلیکھا ٹی وی)شراب لائسنس دے حوالے نال تحقیقات دا سلسلہ جاری اے۔ عثمان بزدار ولوں 17سوالاں دا جواب نیب وچ جمع کروا دتا گیا۔ 4ورقیاں تے مشتمل جواب وزیراعلیٰ پنجاب دے نمائندے عبید اللہ ایڈووکیٹ نے جمع کرایا۔ وزیراعلیٰ پنجاب نے اپنے جواب وچ آکھیا اے شراب لائسنس دے معاملے تے کوئی غیر قنونی کم نہیں کیتا۔ لائسنس دے اجراء وچ کوئی کردار ادا نہیں کیتا، شراب دا لائسنس دین دا اختیار ڈی جی ایکسائز دے کول اے تے ماضی وچ کل 11لائسنس جاری کیتے گئے، 9لائسنس ڈی جی ایکسائز نے آپ جاری کیتے، سال 2000تے 2001وچ گورنر نے لائسنس جاری کیتے۔ تحریری جواب وچ آکھیا گیا وزیراعلیٰ پنجاب نے ڈی جی ایکسائز اکرم اشرف گوندل دی لائسنس اجرا دی پہلی سمری اختیار نہ ہون دی بنیاد تے واپس گھلی، اکرم اشرف گوندل نے لائسنس جاری کرکے دوبارہ سمری وزیراعلیٰ پنجاب سیکرٹریٹ بھجوائی، پرنسپل سیکرٹری نے سمری متعلقہ فورم نہ ہون دی بنیاد تے دوبارہ واپس بھجوا دتی۔جواب وچ عثمان بزدار آکھیا ایکسائز دے وزیر نے متعلقہ ہوٹل نوں دتا گیا شراب دا لائسنس معطل کر دتا، ایس لائسنس نوں لہور ہائی کورٹ نے 2019وچ بحال کر دتا، ہائی کورٹ دے سنگل بنچ دے فیصلے دے خلاف انٹرا کورٹ اپیل اجے وی زیر التوا اے۔