نوازشریف نوں الطاف حسین نال نہیں ملایا جا سکدا: سعد رفیق

لہور: مسلم لیگ (ن) دے رکن قومی اسمبلی خواجہ سعد رفیق آکھیا اے نوازشریف نوں ایم کیو ایم دے قائد نال ملایا نہیں جا سکدا۔ سعد رفیق نے لہور وچ میڈیا نال گل کردیاں آکھیا عمران خان دی حکومت نے کوئی کم نہیں کیتا۔ پی ٹی آئی حکومت نے کسے کم تے توجہ نہیں دتی، صرف کرپشن کرپشن دا رولا پایا اے تے فیر ایس طرح ای کر لینے آں، ایس حکومت تے ایہدے مینڈیٹ نوں کسے جماعت نے تسلیم نہیں کیتا۔ سعد رفیق دا کہنا سی حکومت بہت وڈی چیز اے ایہنوں کم وی بڑے کرنے ہوندے نیں، عمران خان نوں ہن وی سمجھ نہیں آئی کہ حکومت کیویں کرنی اے تے کدوں آنی اے، اوہناں دی توجہ سیاسی مخالفاں نوں گالھاں دین تے اوہناں نوں جیل وچ سُٹن اُتے اے، بیروزگاری دی وجہ توں سٹریٹ کرائمز وچ وادھا ہویا اے۔

سعد رفیق آکھیا نوازشریف نوں ایم کیو ایم دے قائد نال نہیں ملایا جا سکدا، اوہ پاکستان دے تن وار وزیراعظم رہے نیں، سیاسی لیڈر بارے ریمارکس سوچ سمجھ کے دینے چاہیدے نیں، عمران خان دا کل دا بیان ویکھیا جہڑا قنون توڑے گا جیل وچ سُٹ دیواں گا، اوہناں نوں کناں شوق اے لوکاں نوں جیلاں وچ سُٹن دا، انج نظام بہتر نہیں ہووے گا، بہت سارے صحافی تے سیاستدان ایس ویلے جیلاں وچ نیں۔