موٹروے زیادتی کیس، پلس نے تفتیش وچ مدد دین والے وقار الحسن نوں رہا کر دتا

لہور: پلس نے موٹروے ریپ کیس دی تحقیقات وچ مدد دین والے وقار الحسن نوں رہا کر دتا۔پلس دے مطابق وقار نوں 20دن تک حراست وچ رکھیا گیا سی تے اوہدا ڈی این اے وی متاثرہ خاتون نال میچ نہیں ہویا۔ پلس نے دسیا کہ وقار الحسن توں ہون والی تفتیش دی مدد نال ای گرفتار ملزم شفقت تک اپڑے جد کہ کوئی کیس نہ ہون پاروں وقار نوں رہا کیتا گیا۔ موٹروے ریپ کیس دا مرکزی ملزم عابد اجے تک فرار اے جہدی گرفتاری لئی کوشش جاری اے۔

خیال رہوے وقار الحسن نے واقعے مگروں آپ پلس نوں گرفتاری دتی سی پر متاثرہ خاتون نے وقار الحسن نوں پہچانن توں انکار کیتا سی پر وقار نے دوران تفتیش پلس نوں دسیا سی کہ کیس دا مرکزی ملزم عابد اک عرصے توں شفقت نامی بندے نال وارداتاں کر رہیا اے جد کہ شفقت بہاولنگر دا رہائشی تے عابد دا دوست اے، وقار الحسن دے بیان مگروں پلس نے کیس دے اک ملزم شفقت نوں گرفتار کیتا سی۔