کراچی دے جناح ہسپتال وچ ایئر ایمبولینس لئی ہیلی پیڈ فعال

کراچی دے جناح پوسٹ گریجویٹ میڈیکل سینٹر وچ ایئر ایمبولینس لئی ہیلی پیڈ فعال کر دتا گیا۔ ایگزیکٹو ڈائریکٹر جنرل ہسپتال ڈاکٹر سیمی جمالی دا کہنا اے ایئر ایمبولینس دے راہیں دیس دے دور دراز علاقیاں توں شدید زخمی تے بیمار مریضاں دی آمدورفت دی راہ پکی ہو گئی اے۔ اوہناں دا کہنا سی دو دہائیاں دے بعد سندھ سرکار دا اک ہیلی کاپٹر پیڈ تے اتریا اے۔اوہناں نے دسیا 90دی دہائی وچ ہیلی کاپٹر دے راہیں مریضاں نوں لیایا جاندا سی پر جدوں ہیلی پیڈ دی حالت خراب ہوئی تے فیر ایہ معاملہ رک گیا۔

سربراہ جے پی ایم سی دا کہنا سی ہیلی پیڈ تے سرکاری تے نجی ایئر ایمبولینس دے راہیں مریض لیائے جا سکدے نیں۔ ڈاکٹر سیمی جمالی دا کہنا سی سول ایوی ایشن اتھارٹی لینڈنگ لئی جے پی ایم سی نوں سرٹیفکیٹ دے چکی اے تے ڈسٹرکٹ ساؤتھ ولوں کسے وی ہنگامی صورتحال نال نبڑن لئی فائر بریگیڈ دی اک گڈی وی فراہم کیتی گئی اے۔