وزیراعظم دی ہدایت تے دیس دا سب توں وڈا شکایتاں دا نظام مکمل فعال

وزیراعظم عمران خان دی ہدایت تے ملک دا سب توں وڈا شکایتاں دا نظام مکمل فعال کر دتا گیا اے۔ صوبیاں وچ سٹیزن پورٹل تے افسران دے 8864ڈیش بورڈز نوں ذمہ داری تفویض کیتی گئی اے۔ وزیراعظم آفس نے ملک بھر دے 8864توں ودھ سرکاری دفتراں نوں مراسلہ جاری کر دتا اے جہدے وچ سرکاری افسران نوں ڈیش بورڈز توں کمزور طبقے دی شکایتاں درج کرن دا حکم دتا۔

جاری مراسلے وچ سرکاری افسراں نوں بزرگ، بیوہ، معذور بندیاں دی سہولت لئی خصوصی ہدایات کر دتیاں۔ وزیراعظم عمران خان آکھیا پی ٹی آئی سرکار دا منشور عوام دی عملی خدمت کرنا اے، سرکاری اداریاں نوں خدمت لئی ہر صورت پابند بنایا جائے، گورننس دی بہتری عوام، اداریاں وچ بہتر روابط نال مشروط اے۔ پی ایم ڈلیوری یونٹ نے سرکاری اداریاں نوں ضابطہ اخلاق وی گھل دتے۔

ایس حوالے نال سارے وفاقی سیکرٹریاں، چیف سیکرٹریاں، آئی جیز نوں مراسلہ جاری کر دتا اے۔ وزیراعظم آفس ولوں مراسلے وچ آکھیا اے ضرورت مند نوں شکایتاں لئی متعلقہ ادارے جان دی لوڑ نہیں ہووے گی، کسے وی قریبی سرکاری دفتر وچ عملہ شکایتاں درج کرن داپابند ہووے گا تے سرکاری ادارے شہری دی شکایت متعلقہ محکمے نوں گھلن دے پابند ہون گے۔