سمگلنگ وچ ملوث سندھ پلس دے 13پلس افسران تے اہلکار برطرف

کراچی: آئی جی سندھ مشتاق مہر نے سمگلنگ وچ ملوث سندھ پلس دے 13پلس افسراں تے اہلکاراں نوں نوکری توں برطرف کر دتا تے ایس سلسلے وچ تحریری احکامات وی جاری کر دتے نیں۔ وسیلیاں دے مطابق 17اکتوبر 2019نوں وزیراعظم پاکستان دی صدارت اینٹی سمگلنگ سٹیئرنگ کمیٹی دا اجلاس ہویا سی۔

کمیٹی نے سمگلنگ وچ ملوث سندھ پلس دے افسراں تے اہلکاراں دے خلاف کاروائی دی سفارش کیتی سی جہدے تے سمگلنگ وچ ملوث اہلکاراں دے خلاف تن محکمانہ انکوائریاں کرائی گئیاں جہناں وچ پلس افسراں تے اہلکاراں تے سمگلنگ وچ ملوث ہون دا جرم ثابت ہو گیا۔ ڈی آئی جی حیدر آباد نے 13پلس افسراں تے اہلکاراں نوں انکوائری رپورٹاں دے بعد نوکری توں برطرف کر دتا سی۔

برطرف پلس افسراں تے اہلکاراں نے نوکری تے دوبارہ بحال ہون لئی ایڈیشنل آئی جی حیدر آباد توں اپیل کیتی۔ ایڈیشنل آئی جی حیدر آباد نے برطرف پلس افسراں تے اہلکاراں تے لائے جان والے سنگین الزامات نوں یکسر نظر انداز کردیاں ہوئیاں 7ستمبر 2020نوں دوبارہ نوکری تے بحال کر دتا سی۔ آئی جی سندھ مشتاق مہر نے ایڈیشنل آئی جی حیدر آباد دے جاری کیتے بحالی دے احکامات منسوخ کردیاں ہوئیاں ایہناں پلس افسراں تے اہلکاراں نوں نوکری توں دوبارہ برطرف کر دتا۔ ایہناں پلس افسراں تے اہلکاراں وچ سب انسپکٹر حبیب اللہ ساہو، سب انسپکٹر ارشاد علی شاہانی ،سب انسپکٹر غلام اصغر تنیو ،اے ایس آئی سکندرعلی چانڈیو، اے ایس آئی عبدالعزیز کاٹو، اے ایس آئی ممتازبھٹی ،اے ایس آئی فضل محمد، ہیڈ کانسٹیبل مولابخش مگسی ،کانسٹیبل پیارعلی چانڈیو،کانسٹیبل ضمیرجمالی، کانسٹیبل نذیراحمد ،کانسٹیبل الطاف چانڈیو تے کانسٹیبل ناصر احمد شامل نیں۔