برطانوی اخباراں وچ نوازشریف دی طلبی دے اشتہارات شائع کرن دی عرضی رد

اسلام آباد: ہائی کورٹ نے برطانوی اخباراں وچ اشتہار شائع کرن دی وفاق دی عرضی رد کر دتی۔ برطانیہ دے دو اخباراں وچ نوازشریف دا اشتہار جاری کران دی وفاق دی عرضی تے اسلام آباد ہائی کورٹ وچ سماعت ہوئی، کیس دی سماعت جسٹس عامر فاروق دی سربراہی وچ دو رکنی بنچ نے کیتی، وفاق ولوں ایڈیشنل اٹارنی جنرل طارق کھوکھر عدالت دے ساہمنے پیش ہوئے۔

ایڈیشنل اٹارنی جنرل طارق کھوکھر نے بیان دتا عدالت نے نوازشریف دا اشتہار جاری کرن تے اشتہار دی کاپی نوازشریف تک وی اپڑان دا حکم دتا سی، رجسٹرار ہائی کورٹ نے 19اکتوبر لئی اشتہار جاری کرن دا آکھیا سی، ایڈیشنل اٹارنی جنرل نے نوازشریف دے جاری کیتے اشتہار دی کاپی وی عدالت دے ساہمنے پیش کیتی۔ عدالت نے برطانوی اخباراں وچ اشتہار شائع کرن دی وفاق دی عرضی تے فیصلہ سناندیاں ہوئیاں برطانوی اخباراں وچ اشتہار شائع کرن دی وفاق دی عرضی رد کر دتی۔