پشاور وچ مدرسے دے اندر دھماکے نال بالاں سنے 8بندے شہید ،110زخمی

پشاور(پنجابی میڈیا گروپ) دیر کالونی وچ مدرسے دے اندر دھماکے دے نتیجے وچ بالاں سنے 8بندے جاں بحق جد کہ 110زخمی ہو گئے ۔ پشاور دے علاقے دیر کالونی وچ واقع مدرسے دے اندر اوس ویلے دھماکا ہویا جدوں بالاں دی چوتھی تعداد دینی تعلیم حاصل کر رہی سی۔ دھماکے دی شدت ایس قدر زیادہ سی کہ اوہدی آواز دور دور تک سنی گئی۔ابتدائی طور تے اہل علاقہ نے زخمیاں نوں قریبی ہسپتال منتقل کرنا شروع کیتا جد کہ واقعے دی اطلاع ملدیاں ای پلس تے سکیورٹی فورسز دے علاوہ امدادی کارکناں دی چوکھی تعداد وی موقع تے اپڑ گئی۔زخمیاں نوں لیڈری ریڈنگ ہسپتال تے خیبر ٹیچنگ ہسپتال منتقل کیتا گیا جتھے طبی عملے نے 8بالاں دے جاں بحق ہون دی تصدیق کر دتی ۔ مرن والیاں وچ 6بچے وی شامل نیں جہڑے مدرسے وچ ای تعلیم حاصل کر رہے سن۔پلس دا کہنا اے دھماکا خیز مواد اک بیگ وچ رکھیا گیا سی جہڑا اک بندہ رکھ کے گیا سی۔ اے آئی جی شفقت ملک نے میڈیا نوں دسیا کہ دھماکے وچ 5کلو بارودی مواد استعمال کیتا گیا جہڑا ٹائم ڈیوائس نال منسلک سی۔سی سی پی او پشاور دا کہنا سی ہر پہلو توں واقعے نوں ویکھ رہے آں، مدرسے وچ داخل ہون والے مشکوک بندے دی کھوج جاری اے۔ عوام نوں وی اپنی سکیورٹی دا خیال رکھنا چاہیدا اے۔