قومی اسمبلی: ڈپٹی سپیکر نے پیپلزپارٹی دے ارکان آغا رفیع نوں ایوان توں کڈھ دتا

اسلام آباد: قومی اسمبلی اجلاس وچ ہنگامہ آرائی، ڈپٹی سپیکر قاسم خان سوری نے پیپلزپارٹی دے ارکان آغا رفیع نوں ایوان توں باہر کڈھ دتا۔ اپوزیشن ارکان نے سپیکر ڈائس دا گھیراؤ کر لیا۔ ڈپٹی سپیکر قومی اسمبلی آغا رفیع دے احتجاج تے غصے وچ آ گئے تے اوہناں نوں ایوان توں باہر کڈھن دا حکم دے دتا۔ اوہناں آکھیا شور شرابہ کرن والے نوں ایوان توں باہر لے کے جاؤ، ایہ پورے سیشن وچ ایوان وچ نہیں آ سکدے، تسیں ایوان دی کاروائی وچ بہت مداخلت کرن لگ گئے او، ایہناں نوں فوری طور تے ایوان توں باہر کڈھو۔ پیپلزپارٹی دے آغا رفیع نے گل کرن دا موقع نہ ملن تے احتجاج کیتا سی۔

ایس توں پہلاں لیگی رہنما خواجہ آصف نے آکھیا کنک سرپلس سی، اج درآمد کر رہے آں، غلط پالیسی دی وجہ توں 440ارب دا نقصان ہویا، کنک دی کاشت ودھان لئی اقدامات کرنے چاہیدے نیں۔ کسان نوں صرف 40ارب دتے جان تے کنک وچ خود کفیل ہو جاواں گے۔ کنک دے معاملے تے سرکار اپنیاں نوں نواز رہی اے، کنک دی امدادی قیمت 2ہزار روپے من مقرر کیتی جائے۔