غزل
منصور عزمی
دھرتی دے سَاہ نیلے ہوندے جاندے نیں
خورے لوک زہریلے ہوندے جاندے نیں
میرے شہر اِچ چیتر کِنج دا چڑھیا اے
ساوے رُکھ تے پیلے ہوندے جاندے نیں
چِڑیاں جیہڑے نال مشقت جوڑے سَن
آلھنے تیلے تیلے ہوندے جاندے نیں
پھٹ جو میرے کالجے اُتے لگے نیں ! !
کیوں ایڈے بھڑکیلے ہوندے جاندے نیں
کنک دے کُجھ سِٹیاں دِی خاطر ویکھ لووَ
دشمن سبھ قبیلے ہوندے جاندے نیں
مُنصف اَگے کِسراں دیاں صفائی میں
اکھر بے دَلیِلے ہوندے جاندے نیں
عزمیؔ اَج کل ہاسے میریاں لوکاں دے
کیوں ایڈے دردیلے ہوندے جاندے نیں
Users Today : 431
Users Yesterday : 626
Total Users : 735339
Views Today : 3544
Total views : 11638146
Who's Online : 5
